Batys Qazaqstanmen kórshiles Reseı oblystarynda koronavırýs órship tur

ORAL. QazAqparat – Batys Qazaqstanmen kórshiles Reseı oblystarynda koronavırýs órship tur. Bul týraly oblys ákimi Ǵalı Esqalıevtiń tóraǵalyǵymen ótken keńeste BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev málim etti, dep habarlaıdy QazAqparat tilshisi.

N.Mustaevtyń aıtýynsha, sońǵy táýlikte Reseıde 3 398 adamnan indet anyqtaldy. Sonyń ishinde BQO-men shektesetin Samara oblysynda – 55, Saratovta – 64, Orynborda – 17, Volgogradta – 29, Astrahan óńirinde 38 adamnyń syrqattanǵany tirkeldi.

Batys Qazaqstan oblysynda jyl basynan beri dert juqtyrǵan 9 605 naýqastyń 5 033-i – aýrý belgisi bar, 4 572-si – sımptomy joqtar.

Sonyń ishinde qańtarda – 7 098, aqpanda – 2412, naýryzda – 74, mamyrda – 1, maýsymda 4 adamnan koronavırýs tabyldy.

Oblys jasyl aımaqta turǵanymen, shilde aıynda indettiń qaıta kóbeıe bastaǵany alańdatady. Osy aıda 15 naýqastyń 9-y Oral qalasynda, úsheýi Bórli, ekeýi Jańaqala jáne bireýi Báıterek aýdanynda tirkeldi.

«Qazirgi tańda turǵyndardy vaktsınatsııalaý jumysy jalǵasýda. Oblys boıynsha 414 390 adam ekpe alýǵa jatatyn bolsa, sonyń 277 315-i nemese 66,9 paıyzy birinshi, 269 425-i nemese 65 paıyzy ekinshi komponentpen egildi. 200 308 adamnan 99 271-i nemese 49,6 paıyzy revaktsınatsııadan ótti. Qaıtalama revaktsınatsııadan 15 218 adamnyń 4 548-i nemese 29,9 paıyzy ótti. Pfizer vaktsınasymen jasóspirimder, júkti jáne bala emizetin áıelder egilýde. Kúni búgin 63 765 adamnyń 18 122-si nemese 28,4 paıyzy І, 16 582-si nemese 26 paıyzy ІІ komponentti qabyldady», dedi N.Mustaev.

Eske sala keteıik, budan buryn BQO-daǵy sý qoımasynan tyrysqaq aýrýynyń bakterııasy tabylǵanyn jazǵan bolatynbyz.

Foto: tass.com