Batys Qazaqstanda jyl basynan beri 2300-den astam bala koronavırýs juqtyrdy

ORAL. QazAqparat – Batys Qazaqstan oblysynda jyl basynan beri 2313 bala koronavırýs juqtyrdy, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, sonyń 2162-si jazylyp shyqsa, 151-i emdelý ústinde.

Óńirde bıyl balalardyń koronavırýsqa shaldyǵýy óskeni baıqalady.

Basqarmadan túsken málimetke qaraǵanda, koronavırýs juqtyrýdyń jalpy deńgeıi sońǵy aptada aldyńǵymen salystyrǵanda, 9,7 paıyzǵa tómendedi.

Qazirgi tańda oblys boıynsha 1373 adam ambýlatorııalyq em alýda.

Infektsııalyq statsıonarlarda 450 naýqas em qabyldap jatyr. Sonyń 176-sy qalalyq modýldik statsıonarda, 85-i oblystyq juqpaly aýrýlar aýrýhanasynda, 94-i oblystyq kópbeıindi aýrýhanada jatyr. Sondaı-aq aýdandardaǵy aýrýhanalarda da emdelip jatqandar bar. Statsıonarlar 42,3 paıyzǵa tolǵan.

Jansaqtaý bólimshesindegi 41 naýqastyń beseýi jasandy tynys alý apparatyna qosylǵan.

Sońǵy táýlikte 69 adamnan koronavırýs anyqtalsa, 70 naýqas emdelip shyqty.

Eske sala keteıik, budan buryn Batys Qazaqstanda sońǵy tórt kúnde 370 adamnan koronavırýs tabylǵanyn, indetke qarsy vaktsına saldyrǵandar sany 211 myńnan asqanyn jazǵan bolatynbyz.