Batys Qazaqstanda júrgizýshi avtokóligimen Jaıyq ózenine batyp ketti
ORAL. QazAqparat – Batys Qazaqstan oblysynda bir kúnde eki adam sýǵa ketti, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, birinshi oqıǵa 30 mamyr kúni Aqjaıyq aýdany Esensaı aýyly tusynda Jaıyq ózeninde boldy.
Saǵat 15.24-te Esensaıdan Chapaevqa qaraı jetkizetin paromda tejegish quralynyń aqaýy saldarynan «VAZ-2121» avtokóligi sýǵa ketti. Onyń ishinde 49 jastaǵy júrgizýshi bolǵan.
Saǵat 19.14-te jedel qutqarý jasaǵynyń kúshimen (4 adam, 1 tehnıka) júrgizýshiniń múrdesi men avtomobıl sýdan shyǵaryldy.
Sondaı-aq taǵy bir qaıǵyly oqıǵa jeksenbi kúni Báıterek aýdany Peremetnyı aýylynda boldy. Saǵat 19.00-de Derkól ózenine shomylýǵa belgilenbegen jerden túsken 24 jastaǵy jigittiń denesin kýágerler alyp shyqqan. Ol belgisiz jaǵdaıda batyp ketken.
BQO TJ departamenti sýda qaýipsizdik erejesin saqtaý qajettigin taǵy da eske salady.
Eske sala keteıik, budan buryn Oralda er adamnyń mas kúıinde kópirden sekirip ketkenin jazǵan bolatynbyz.
