Batys Qazaqstanda «Jumyspen qamtýdyń jol kartasy» aıasynda 178 joba júzege asady
Atalmysh másele talqylanǵan jıynda oblys ákiminiń orynbasary Tımýrjan Shákimov málim etkendeı, osy jobalarǵa 35,5 mlrd teńge qarastyrylǵan.
Qazirgi tańda 157 jobanyń merdigerleri anyqtalyp, 142-si boıynsha jumys júrgizilýde.
Oblystyq qurylys basqarmasy baǵdarlama aıasynda ǵımarattar men nysandar turǵyzatyn óńir kásipkerlerin qoldaý maqsatynda qajetti qurylys materıaldaryn eseptep shyǵardy. Aıtalyq, 178 nysanǵa 3,642 mln dana kirpish, 410 myń dana keramıkalyq kirpish, 6845 tonna tsement, 8786 sharshy metr áınekpaket, 48792 sharshy metr profnastıl, 1511 tonna metall, 205014 tekshe metr qıyrshyqtas qajet.
Osy oraıda jergilikti kásiporyndardyń ónimderine basymdyq beriledi. Mysaly, «Batys Qazaqstan qurylys materıaldary korporatsııasy» AQ sılıkat kirpishin, «Japarqulov» JK keramıkalyq qyzyl kirpish, «Stekloservıs» JShS áınekpaket, «Stroıkombınat» pen «Gıdromash-Orıon-MJBK» JShS temirbeton buıymdaryn, «Oral saýda-ónerkásip kompanııasy» men «KazConstructionGroup» JShS polıetılen turbalaryn, «Agran» JShS profnastıl, «EURASIAN TREND» JShS bólmearalyq esikter, «Oral Kabel» JShS kabelderdi qajetti mólsherde shyǵara alady.
«Munyń tıimdiligi sol, «Jumyspen qamtýdyń jol kartasy» aıasynda júzege asatyn jobalardy ońtaılandyrý nátıjesinde aldyn ala esep boıynsha 886,7 mln teńge únemdelmek. Kúni búgin Oral qalasy men aýdandar ákimdikteri únemdelgen qarjyny paıdalaný máseleni qarastyrýda. Mysaly, Oral qalasy boıynsha 11,2 mlrd teńgege 65 joba júzege asyrylmaqshy. Sonyń ishinde 35 joba boıynsha 199,2 mln teńgeni únemdeý kózdelýde. Osyndaı esepter aýdandar boıynsha da jasalýda», dedi T.Shákimov.
Sondaı-aq elektrondy saýda alańy, «Eńbek Balapan» jobasy talqylanǵan keńeske tóraǵalyq etken óńir basshysy Ǵalı Esqalıev barlyq jobalardy sapaly júzege asyrý qajet ekenin atap kórsetip, qala, aýdan ákimderine baqylaýdy kúsheıtýdi tapsyrdy.
