Batys Qazaqstanda juqpaly aýrýlar statsıonarynda 260 adam emdelýde
ORAL. QazAqparat – Batys Qazaqstan oblysynda 534 tósektik 7 juqpaly aýrýlar statsıonarynda 260 naýqas emdelýde, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń óńirlik kommýnıkatsııalar qyzmeti alańynda málim etkenindeı, sondaı-aq 185 tósektik 4 karantındik statsıonarda 28 adam jatyr.
Arman Talǵatulynyń sózine qaraǵanda, jansaqtaý bóliminde 25 naýqas bolsa, sonyń beseýi – 40-60 jas, 11-i – 60-80 jas aralyǵyndaǵylar, qalǵan 9-y – 80-nen asqandar. 23 naýqastyń sozylmaly aýrýy bar, sonyń ishinde 19-y júrek-qan tamyrlary dertine shaldyqqan.
Kúni búgin ınvazıvti ókpeni jasandy jeldetý apparatyna 1, ınvazıvti emes apparatqa 8, ottegi kontsentratoryna 12, ortalyqtandyrylǵan ottegi kózine 59 naýqas qosylǵan.
Oblysta osy kezge deıin 9793 adam indet juqtyrsa, sonyń 8473-i nemese 86,5 paıyzy jazylyp shyqty. 175 adam kóz jumdy.
«8 qańtarda 200 tósektik jańa modýldik aýrýhana óz jumysyn bastady. Sonyń 20 tósek-orny jansaqtaý bóliminde, 20-sy ıntensıvti terapııa palatalarynda ornalasqan. Jańa joǵary deńgeıdegi zamanaýı medıtsınalyq qural-jabdyqtarmen tolyq qamtylǵan. Mysaly, kompıýterlik tomografııa, statsıonarlyq jáne tsıfrlyq rentgen apparattary, ýltradybystyq zertteý apparattary, ókpeni jasandy jeldetý apparattary jáne jeke zerthana bar. Ár tósek-oryn 5 perfýzormen jáne ottegimen qamtamasyz etilgen», dedi A.Qalıbekov.
Eske sala keteıik, budan buryn Batys Qazaqstanda bir kompanııanyń 47 qyzmetkerinen koronavırýs tabylǵanyn jazǵan bolatynbyz.
