Batys Qazaqstanda jolǵa dep bólingen 3,2 mlrd teńge ıgerilmeı qalǵan
Oblys ákiminiń orynbasary Temirhan Meńdiǵalıevtiń málim etkenindeı, osy qarjyny respýblıkalyq bıýdjetke qaıtarýǵa týra keldi.
Onyń aıtýynsha, bıtýmnyń tapshylyǵy jáne temirjol vagondarynyń jetispeýshiligi saldarynan Aqtóbe oblysynan qıyrshyq tas jetkizilmegendikten, Barbastaý-Aqjaıyq-Inderbor, Bórli-Aqsaı-Jympıty jáne Jańaqala-Saıqyn baǵytyndaǵy joldarda aýqymdy jumystar atqarylmaı qaldy.
Bul jerde merdiger mekemelerdi kinálaý qıyn. Áńgime bıtým men qıyrshyq tastyń der kezinde jetkizilmeýinde bolyp otyr. Mysaly, BQO-da vagondarmen qamtý deńgeıi tómen. Onyń ústine temirjol Shyńǵyrlaý, Bórli, Terekti, Báıterek jáne Tasqala aýdandary arqyly ǵana ótedi. Qalǵan aýdandarǵa qurylys materıaldaryn avtokóliktermen tasýǵa týra keledi. Qazirgi kezde osy máseleni sheshý úshin Jol kartasyn júzege asyrý oılastyrylýda. Osy baǵytta tıisti mekemelermen, sonyń ishinde «Qazaqstan temir joly» kompanııasymen kelissózder júrgizilýde.
T.Meńdiǵalıevtiń sózine qaraǵanda, «Qýatty óńirler – eldi damytýdyń draıveri» ulttyq jobasy aıasynda bıyl 61 jobany júzege asyrý úshin 27 mlrd teńge bólinip, 350 shaqyrymnan astam jergilikti joldardy jóndeý josparlanǵan edi.
«Osy jobalardyń 27-si boıynsha kózdelgen mejege qol jetkizildi. 11 joba boıynsha nysandar paıdalanýǵa berildi. Al 5 joba merdigerlerdiń anyqtalmaýyna, sotta qaralýyna baılanysty iske asyrylǵan joq. Sondaı-aq bıtým tapshylyǵy, temirjol vagondarymen ınertti materıaldardyń jetkizilmeýi jáne dızel otynynyń jetispeýshiligi men qymbattaýyna baılanysty 17 joba boıynsha jumystar merziminen buryn toqtap qaldy. 11 aıdyń qorytyndysy boıynsha jergilikti joldardyń 246 shaqyrymy jóndelip, olardyń jaqsy jáne qanaǵattanarlyq jaǵdaıdaǵy úlesi 46 paıyzǵa ǵana jetti. Qazirgi kezde aldaǵy jylǵa daıyndyq jumystary júrgizilýde», dedi T.Meńdiǵalıev.
2023 jyly jergilikti joldardy jóndeýge 21,9 mlrd teńge qarastyrylyp, 71 jobany júzege asyrý oılastyrylýda. Sonyń ishinde 27 jańa jobanyń 18-i boıynsha konkýrstyq rásimder ótkizilip, merdiger uıymdar anyqtaldy.
Eske sala keteıik, budan buryn BQO-da ońtústik aýdandarǵa jol salýda óreskel kemshilikter anyqtalyp otyrǵanyn jazǵan bolatynbyz.
Sondaı-aq Oralda jylý-qýat ortalyǵynda qaıta qurý jumystary júrgiziledi.