Batys Qazaqstanda jolda qalǵan 7 adam qutqaryldy
ORAL. QazAqparat – Batys Qazaqstan oblysynda jolda qalǵan 7 adam qutqaryldy, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 3 aqpan kúni Qaztalov aýdanynda boldy.
Saǵat 05.49-da №11 órt sóndirý bóliminiń «101» telefonyna Bozoba aýyly mańynda VAZ-2115 avtokóliginiń jolda turyp qalǵany jóninde habar túsken.
Oqıǵa ornyna jedel jetken qutqarýshylar ÝAZ avtokóligimen 7 adam, sonyń ishinde 2 balany Qaztalov aýylyna jetkizdi. Qutqarylǵandar medıtsınalyq kómekti qajetsinbedi.
Qaztalov aýdany №11 órt sóndirý bólimi qyzmetkerleriniń jedel is-qımyly nátıjesinde eshkim zardap shekken joq.
BQO TJ departamenti qys kezinde joldarda qaýipsizdik talaptaryn qatań saqtaý kerektigin eske salady. Joldardaǵy jaǵdaı týraly málimetti «Dermen» mobıldi qosymshasynan alyp, qutqarýshylar kómegi qajet bolǵan kezde «112» nómirine habarlasýǵa bolady.
Eske sala keteıik, budan buryn Oralda kópqabatty úıdegi páter órtenip, 2 bala qutqarylǵanyn, Batys Qazaqstanda qalyń tumanǵa baılanysty respýblıkalyq joldar jabylǵanyn jazǵan bolatynbyz.
