Batys Qazaqstanda jol apatynan júrgizýshi kóz jumdy
BQO polıtsııa departamentiniń baspasóz qyzmeti málim etkenindeı, oqıǵa 18 qyrkúıek kúni Báıterek aýdany aýmaǵynda boldy.
Saǵat 09.00-de Oral-Kırsanov joly boıynda Trekın aýyly tusynda 1991 jylǵy er adam aıdap kele jatqan «Opel» men «Lada Prıora» avtokóligi (1994 jylǵy júrgizýshi) qaqtyǵysqan.
Sonyń saldarynan eki júrgizýshi de aýrýhanaǵa jatqyzyldy.
Keıin «Lada Prıora» avtokóliginiń júrgizýshisi jansaqtaý bóliminde qaıtys boldy.
«Qazirgi kezde QR QK 345-baby 3-bóligine sáıkes sotqa deıingi tergeý amaldary júrgizilýde. Tergeý barysynda birneshe saraptama taǵaıyndaldy. Oqıǵanyń sebep-saldary anyqtalý ústinde. Basqa aqparat QR Qylmystyq is júrgizý kodeksiniń 201-babyna sáıkes jarııalaýǵa jatpaıdy», dep habarlady QazAqparat tilshisine departamenttiń baspasóz qyzmeti.
Eske sala keteıik, budan buryn Oralda Ulttyq ulan jaýyngerleriniń jol apatyna ushyraǵan úsh áıelge qolushyn bergenin jazǵan bolatynbyz.