Batys Qazaqstanda jol apatynan úsh adam jaraqat aldy
ORAL. QazAqparat – Batys Qazaqstan oblysynda jol apatynan úsh adam jaraqat aldy, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa búgin túngi saǵat 01.55-te Oral-Atyraý jolynyń 180-shaqyrymynda oryn aldy.
Volkswagen Polo avtokóliginiń júrgizýshisi qatty jyldamdyqpen kele jatyp, rýlge ıe bola almaı qalǵan. Sonyń saldarynan aýdarylǵan avtokólikte úsh adam bolǵan.
Chapaev trassalyq medıtsınalyq-qutqarý beketine málimet túsisimen quramynda feldsherler Bekbolat Qurmanǵalıev, Raıymbek Tynybekov, qutqarýshy-sanıtar Nurlybek Muratov jáne qutqarýshy-júrgizýshi Qudaıbergen Esenov bar jedel kómek kórsetý brıgadasy oqıǵa ornyna attandy. Brıgada zardap shekken úsh adamǵa, sonyń ishinde bir balaǵa jedel medıtsınalyq járdem kórsetip, olardy Aqjaıyq aýdandyq ortalyq aýrýhanasyna jetkizdi.
Oblystyq densaýlyq saqtaý basqarmasy baspasóz qyzmetiniń naqtylaýynsha, eki er adam, 8 jasar balany dárigerler qaraǵan. Sodan keıin olar ambýlatorlyq em alýǵa jiberilgen.
