Batys Qazaqstanda jol apatynan eki adam qaza tapty
BQO polıtsııa departamentiniń baspasóz qyzmetinen málim etkenindeı, birinshi oqıǵa 8 tamyz kúni saǵat 2:20-da Shyńǵyrlaý aýdany Aqsý aýylynda boldy. Dostyq kóshesinde 1993 jylǵy júrgizýshi «Aýdı 80» avtokóliginiń rýline ıe bola almaı aýdarylǵan. Kólikte bolǵan 1997 jylǵy jolaýshy oqıǵa ornynda kóz jumdy. Júrgizýshi aýdandyq ortalyq aýrýhananyń hırýrgııalyq bólimine jatqyzyldy.
Taǵy bir oqıǵa 9 tamyz kúni Bórli aýdanynda Podstepnyı-Fedorov-RF shekarasy jolynyń 95-shaqyrymynda boldy. Shamamen saǵat 7:10-da Bórli aýylynan shyǵa beriste, Bórli-Aqsaı jolynyń qıylysynda 1963 jylǵy júrgizýshi «Aýdımen» jol bermeı, 1985 jylǵy turǵyn aıdap kele jatqan «Toıota Land Krýzer» avtokóligimen soqtyǵysqan. Oqıǵa saldarynan 1963 jylǵy júrgizýshi sol jerde jan tapsyrdy. «Toıota Land Krýzer» avtokóliginiń júrgizýshisi dáriger qaraǵannan keıin úıine jiberildi.
«Avtokólikter arnaıy turaqqa qoıyldy. Eki oqıǵa boıynsha QR QK 345-baby 3-bóligine (abaısyzda adam ólimine soqtyrǵan jol júrý erejesin buzý) sáıkes sotqa deıingi tergeý amaldary bastaldy. BQO polıtsııa departamenti jol júrý erejesin saqtap, abaı bolý, qaýipsizdik beldigin mindetti túrde taǵý qajettigin turǵyndar esine salady», - dep habarlady vedomstvodan.
Eske sala keteıik, budan buryn Oralda kásipkerdi óltirgen kúdiktilerdiń ustalǵanyn jazǵan bolatynbyz.
