Batys Qazaqstanda jol apatynan eki adam qaza tapty
ORAL. QazAqparat – Batys Qazaqstan oblysynda jol apatynan eki adam qaza tapty, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 28 jeltoqsan kúni saǵat 17.24-te Samara-Shymkent jolynyń 375-shaqyrymynda boldy.
Syrym aýdany Qyzylaǵash aýylynan 7 shaqyrym qashyqtyqta «VAZ-2114» jáne «Leksýs» avtokólikteri soqtyǵysty.
Sonyń saldarynan «VAZ-2114» avtokóliginiń júrgizýshisi men jolaýshysy mert boldy. №14 órt sóndirý beketiniń qyzmetkerleri olardyń avtokólikte qysylyp qalǵan denelerin shyǵardy.
Sonymen qatar saǵat 17.31-de Oral-Atyraý jolynyń 242-shaqyrymynda Aqjaıyq aýdany Almaly aýylynyń tusynda 28 jastaǵy júrgizýshi rýlge ıe bola almaı qalǵan. Sóıtip ol «Lada Granta» avtokóliginiń aýdarylýyna jol berdi. №20 órt sóndirý beketiniń qyzmetkerleri júrgizýshi men tórt jolaýshyny evakýatsııalap, Taıpaq aýylyndaǵy jylytý pýnktine jetkizdi.
BQO TJ departamenti qolaısyz aýa raıy kezinde jolda abaı bolý kerektigin eskertedi.
Eske sala keteıik, budan buryn Batys Qazaqstanda barlyq baǵyttaǵy joldar jabylǵanyn jazǵan bolatynbyz. Aýa raıynyń jaqsarýyna baılanysty jergilikti saǵat 21.00-den bastap barlyq joldar qaıta ashyldy .
