Batys Qazaqstanda jol apattarynan taǵy eki adam qaza tapty
ORAL. QazAqparat – Batys Qazaqstan oblysynda ótken demalys kúnderi jol apattarynan taǵy eki adam qaza tapty, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, birinshi oqıǵa 17 sáýir kúni saǵat 20.00-de Samara-Shymkent jolynda boldy.
21 jastaǵy júrgizýshi «Aýdı-80» avtokóligimen kele jatyp, joldaǵy shuńqyrdy aınalyp ótemin dep, rýlge ıe bola almaı, aýdarylýǵa jol berdi.
Sonyń saldarynan avtokólikte otyrǵan jolaýshylar zardap shekti. 1966 jylǵy áıel adam Oral qalalyq kópbeıindi aýrýhanaǵa jetkizilgenimen, kóp uzamaı kóz jumdy. 1996 jylǵy áıel men 2018 jáne 2020 jylǵy kishkentaı balalar túrli jaraqat aldy.
18 sáýir kúni saǵat 03.00-de Oral-Kırsanov jolynyń 13-shaqyrymynda Báıterek aýdany Volodar aýyly tusynda jol apaty boldy. 1973 jylǵy júrgizýshi «Ford Galaksı» avtokóligimen er adamdy qaǵyp ketti. Polıtsııa qyzmetkerleri jaıaý júrginshiniń 1959 jylǵy turǵyn ekendigin anyqtady. Ol jedel járdem kelgenge deıin qaıtys boldy.
Eske sala keteıik, budan buryn Batys Qazaqstanda 18 sáýir kúni taǵy bir avtokólik aýdarylyp, 66 jastaǵy áıeldiń kóz jumǵanyn jazǵan bolatynbyz.
Qazirgi kezde atalǵan úsh derek boıynsha QR QK 345-baby 3- bóligine (abaısyzda adam ólimine soqtyrǵan jol júrý erejesin buzý) sáıkes sotqa deıingi tergeý amaldary júrgizilýde.
Avtokólikter arnaıy turaqqa qoıyldy.
