Batys Qazaqstanda joǵalǵan er adam 14 kúnnen keıin Atyraýdan tabyldy
ORAL. QazAqparat – Batys Qazaqstan oblysynda joǵalyp ketken er adam Atyraýdan tabyldy, dep habarlaıdy QazAqparat tilshisi.
Báıterek aýdany Darııan aýylynda turatyn 34 jastaǵy, kóz janarynan ekinshi toptaǵy múgedek Leonıd Bogomolov úıinen 14 qańtar kúni shyǵyp ketken.
Sodan beri úıine oralmaǵan er adamdy polıtsııa qyzmetkerleri izdestirgen bolatyn.
Báıterek aýdany Prıýral polıtsııa bólimi 14 kúnnen keıin L.Bogomolovtyń keshe Atyraýdan tabylǵanyn jetkizdi.
BQO polıtsııa departamentiniń baspasóz qyzmeti málim etkendeı, ótken jyly oblysta joǵalǵan azamattardy izdestirý jóninde 145 aryz túsip, 96 adamnyń qaıda júrgeni qysqa merzimde anyqtalǵan.
Bıyl izdestirý barysynda Oralda buryn birneshe ret qylmystyq jaýapkershilikke tartylǵan 38 jastaǵy er adamnyń qaıda júrgeni belgili boldy.
Ol 5 qańtarda úıinen shyǵyp ketkennen oralmaǵan. Polıtsııa qyzmetkerleriniń izdestirýi arqasynda qazir ol úıinde.
Jýyrda ǵana jaqyn-jýyqtarynyń joǵalǵany jóninde polıtsııaǵa 10 aryz tússe, sonyń ishinde 7 adamnyń qaıda ekeni izi sýymaı anyqtaldy.
Qalǵan úsh adam izdestirý isteri júrgizilgennen keıin birneshe kún ótken soń tabyldy.
Eske sala keteıik, budan buryn Oralda joǵalyp ketken jeti jasar balanyń tabylǵanyn jazǵan bolatynbyz.
