Batys Qazaqstanda jergilikti joldarǵa bólingen qarjy kólemi eki esege ósti
BQO jolaýshylar kóligi jáne avtomobıl joldary basqarmasynyń basshysy Aıdar Meńeevtiń óńirlik kommýnıkatsııalar qyzmeti alańynda ótken brıfıngte málim etkenindeı, bıyl oblystyq jáne aýdandyq mańyzy bar joldardy damytýǵa 23,8 mlrd teńge qaraldy, sonyń ishinde 20,5 mlrd teńge respýblıkalyq, 3,3 mlrd teńge jergilikti bıýdjetten bólindi.
Aıdar Qazbekulynyń sózine qaraǵanda, bul joldardyń jalpy uzyndyǵy - 4 762 kılometr.
Aldyńǵy jyldarmen (2020 jyly - 12 mlrd teńge, 2021 jyly - 15 mlrd teńge) salystyrǵanda, qarjylandyrý kólemi eki esege ulǵaıdy.
Atalǵan qarajatqa 94 eldi mekendi qamtıtyn 351,2 km jergilikti joldardy jóndeý jumystary júrgizilýde. Sonymen qatar respýblıkalyq jáne oblystyq trassalardan jalpy uzyndyǵy 169 km bolatyn 22 eldi mekenge kirme joldar retke keltirilýde.
Atap aıtqanda, Barbastaý-Aqjaıyq-Inder (43-93 km), Chapaev-Jańaqala-Saıqyn (130-191 km), Bórli-Aqsaı-Jympıty (68-139 km), Tasqala-Aqqýraı-Bolashaq (96-157 km), Fedorov-Aqsaı (28-82) jáne basqa negizgi baǵyttar boıynsha jóndeý jumystary atqarylýda.
Basqarma basshysynyń aıtýynsha, jyl qorytyndysy boıynsha normatıvtik jaǵdaıdaǵy jergilikti joldardyń úlesin 39-dan 46 paıyzǵa deıin jetkizý kózdelýde. On aıda osy joldardyń 220 shaqyrymy jóndelip, 20,9 mlrd teńge ıgerildi (73 paıyz).
Sondaı-aq avtojoldardy qys kezinde kútip ustaýǵa da basa mán berilýde. Munymen aınalysatyn 28 merdiger uıymda 319 qar tazalaǵysh tehnıka bar.
«Bıyl oblystyń avtomobıl joldaryna barlyǵy 55,770 mlrd teńge bólindi. Bul qarjyǵa 107 joba boıynsha barlyq mańyzdaǵy 662 km jol salynyp, jóndeý jumystarymen qamtyldy», - dedi A.Meńeev.
Eske sala keteıik, budan buryn BQO-da ońtústik aýdandarǵa jol salýda óreskel kemshilikter anyqtalyp otyrǵanyn jazǵan bolatynbyz.