Batys Qazaqstanda jeke balabaqshalar sany 43-ke jetti
ORAL. QazAqparat - Batys Qazaqstan oblysynda jeke balabaqshalar sany 43-ke jetti, dep habarlaıdy «QazAqparat» tilshisi.
Oblys ákimi Altaı Kólginovtiń aıtýynsha, 2016 jyly óńirde 24 qana jeke balabaqsha bolǵan edi. Osyndaı jumystar nátıjesinde 3-ten 6 jasqa deıingi búldirshinderdi mektepke deıingi bilim berý mekemelerimen qamtý 99,9 protsentke jetip otyr. Degenmen balabaqsha áli de qajet. Bul baǵytta jeke kásipkerlerdi tartý arqyly memlekettik-jekeshelik áriptestik aıasyndaǵy jobalar jalǵasatyn bolady.
Oblys mektepterinde ystyq tamaqpen qamtamasyz etý kórsetkishi 95 protsentti qurasa, ınklıýzıvti bilim berý múmkindigi shekteýli balalardyń 61 protsentin qamtydy. Internetke oblystyń 380 mektebi tolyq qosylsa, onyń 330-y keń jolaqty ınternetpen qamtylǵan.
Oblys mektepterinde 12200-den astam muǵalim jumys jasaǵanymen, 38 maman jetispeıdi. 2017 jyly alǵash ret jergilikti bıýdjet esebinen mektepterdiń 190 túlegine bilim granty berilse, sonyń 66-sy bolashaq muǵalimderdiń enshisine tıdi.
Bıyl bilim salasynyń jańartylǵan baǵdarlamasyna sáıkes bastaýysh jáne orta synyp muǵalimderiniń jalaqysy 30 protsentke deıin kóteriledi.
Aıta keteıik, 2017 jyly bilim salasyna bólingen qarajat 5,5 protsentke ósip, 57,7 mlrd teńgege jetti, bul - jalpy shyǵynnyń 31 protsenti. Ótken jyly sondaı-aq 14 nysannyń (onyń teń jartysy mektep, úsheýi balabaqsha, bir-birden ınternat, sport lageri jáne sport zaly) qurylysy júrgizildi.
