Batys Qazaqstanda jazǵy demalys orny órtendi
ORAL. QazAqparat – Batys Qazaqstan oblysynda órt sóndirýshiler janyp jatqan jazǵy demalys ornynan gaz ballonyn alyp shyqty, dep habarlaıdy QazAqparat tilshisi.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń málim etkenindeı, oqıǵa 13 mamyr kúni Báıterek aýdany Asan aýylynda oryn aldy.
Saǵat 11.41-de «Picnic» jaǵajaıynda jazǵy demalys orny otqa orandy.
Órt aýmaǵy 120 sharshy metrdi qamtydy. Jalyn ishinen gaz ballony shyǵaryldy.
«Tilsiz jaý» saǵat 12.49-da aýyzdyqtaldy.
«Mundaı jaǵdaı oblysta birinshi ret kezdesip otyrǵan joq. Órt sóndirýshiler budan buryn da gaz ballondaryn alyp shyqqan bolatyn. Órt kezinde gaz ballonynyń jarylý qaýpi joǵary. Sondyqtan turǵyndarǵa órt qaýipsizdigi erejelerin qatań saqtaý kerektigin eskertemiz», dedi QazAqparat tilshisine E.Tóregeldıev.
Eske sala keteıik, budan buryn Oralda órt sóndirýshiler ottyń ortasynan eki gaz ballonyn alyp shyqqanyn jazǵan bolatynbyz.
