Batys Qazaqstanda Jaıyq ózeninde sý deńgeıi kóterilýi múmkin

ORAL. QazAqparat – Batys Qazaqstan oblysynda Jaıyq ózeninde sý deńgeıi kóterilýi múmkin, dep habarlaıdy QazAqparat tilshisi.

Oblys ákiminiń orynbasary Erjan Baltaevtyń óńirlik kommýnıkatsııalar qyzmeti alańynda málim etkenindeı, Jaıyq ózeni naýryzdyń sońy men sáýirdiń basynda tasýy yqtımal.

Sarapshylardyń esepteýinshe, ondaǵy sý deńgeıi 700-800 santımetrge deıin jetýi múmkin.

Qazirgi kezde Shaǵan ózeninde sý deńgeıi kóterilip jatyr.

E.Baltaevtyń sózine qaraǵanda, bir aptanyń ishinde qardyń 60 paıyzynyń kúrt erýine jáne tońnyń qalyńdyǵyna baılanysty óńirde kúrdeli jaǵdaı qalyptasyp, Oral qalasy men bes aýdanda tótenshe jaǵdaı jarııalandy.

Sý tasqynynyń aldyn alý baǵytynda 2023-2025 jyldarǵa arnalǵan jol kartasy jáne ınjenerlik jobalar aıasynda ótken jyly tıisti is-sharalar atqaryldy. Mysaly, Tasqala, Zelenyı, Jalpaqtal, Shalǵyn aýyldary mańynda bógetter men arnalar tazartyldy. Sonyń nátıjesinde tasqynǵa tosqaýyl qoıyldy.

«Oblys boıynsha Oral qalasy men on aýylda sý tasqynyna qarsy is-sharalar júrgizilip jatyr. Eldi mekender azyq-túlikpen qamtylǵan, medıtsınalyq jáne basqalaı qyzmet kórsetilýde. Óńirde 73 úıge sý ketse, barlyǵynan tolyqtaı sý soryldy. Kúni búgin 20 saıajaı úıinen sý sorylýda. Mańǵystaý jáne Atyraý oblysy tótenshe jaǵdaılar departamentterinen 100-den astam adam tehnıkalarymen kómekke keldi. Sondaı-aq 100-den astam eriktiler qolushyn berdi. Ásirese, olar Syrym, Qaratóbe aýdandarynda belsendilik kórsetti. Búgingi tańda Syrym, Qaratóbe, Tasqala aýdandarynda qaýip seıildi. Endigi basty nazar Bórli, Báıterek, Kaztalov aýdandary jáne Oral qalasynda. Qala boıynsha 11 monıtorıngtik top jumys jasap, sý deńgeıin úzdiksiz baqylaýda. Jaıyq tasyǵan kezde ózen jaıylmalarynda ornalasqan saıajaı úılerine qaýip tónýi yqtımal. Sondyqtan sol mańdaǵy turǵyndarǵa aldyn ala eskertilip, evakýatsııalyq qosyndar anyqtaldy», dedi E.Baltaev.

BQO TJ departamentiniń bastyǵy Ernur Ótegenov oblys boıynsha evakýatsııalanǵan 297 adamnyń 170-i úılerine oralǵanyn jetkizdi. Qalǵan 127-si týystarynda.

Eske sala keteıik, budan buryn BQO-nyń Qaratóbe aýdanynda tótenshe jaǵdaı jarııalanǵanyn jazǵan bolatynbyz.

Sondaı-aq Batys Qazaqstanda 50-den astam turǵyn úı sýda qalyp qoıdy.

Tótenshe jaǵdaı jarııalanǵan Kaztalov aýdanynda qaýip seıilgen joq.

BQO-da kólik qatynasy úzilgen aýyldardan 11 júkti áıel shyǵaryldy.

Batys Qazaqstanda 100-den astam kıik sýdan shyǵaryldy.

BQO-da 100-den astam adam úılerine oralyp jatyr.