Batys Qazaqstanda Jaıyq ózeni arqyly avtokópir salynady
ORAL. QazAqparat - Batys Qazaqstanda Jaıyq ózeni arqyly ótetin jańa avtokópir salý kózdelýde. Bul týraly búgin óńirlik kommýnıkatsııalar qyzmetindegi brıfıngte BQO jolaýshylar kóligi jáne avtomobıl joldary basqarmasy basshysynyń mindetin atqarýshy Medet Shaqaev málim etti, dep habarlaıdy QazAqparat tilshisi.
Onyń aıtýynsha, qazirgi kezde Aqjaıyq aýdanynyń ortalyǵy Chapaev aýyly tusyndaǵy kópirdiń jobalyq-smetalyq qujattamasy memlekettik saraptamadan ótýde. Jobanyń quny - 33,9 mlrd teńge. Kópir qurylysyn 2019 jyly bastaý josparlanýda.
Esepteýler boıynsha atalmysh kópir jol qatynasyn shamamen 1 myń shaqyrymǵa qysqartýǵa múmkindik beredi. Bylaısha aıtqanda, Aqtóbe-Jympıtydan kelip, Chapaev arqyly Batys Qazaqstannyń ońtústik aýdandaryna, sondaı-aq Reseı Federatsııasynyń Volgograd sııaqty oblystaryna, Stavropol jáne Krasnodar ólkelerine, Kavkaz ben onyń arǵy jaǵyndaǵy respýblıkalarǵa, Eýropanyń ońtústigindegi elderge tikeleı shyǵýǵa bolady. Osy baǵyttarǵa júk tasymalyn jeńildetedi. Oǵan qosa munyń jol boıynda turatyn halyq úshin áleýmettik mańyzy bar. Jańadan qyzmet kórsetý nysandary salynyp, jumys oryndary ashylady.
