Batys Qazaqstanda «Jaıyq ormany» rezervatyn qurý josparlanýda
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń óńirlik kommýnıkatsııalar qyzmeti alańynda ótken brıfıngte málim etkenindeı, qazirgi kezde daıyndyq jumystary júrgizilýde.
Onyń aıtýynsha, ınspektsııa osy baǵytta 2022 jyly kólemi 46 969 gektardy quraıtyn Jaıyq ózeni boıynda ornalasqan memlekettik orman qoryn komıssııamen zerttep, oblys ákimdiginiń qaýlysymen rezervke qoıylýyna atsalysty.
Kúni búgin memlekettik orman qory jerleriniń jalpy kólemi 219 myń 923 gektar bolsa, sonyń 89 576-sy ormanmen kómkerilgen. Ótken jyldyń qorytyndysy boıynsha orman alqaby 115 gektarǵa ulǵaıtyldy.
«Prezıdenttiń memlekettik orman qory aýmaǵynda 2 mlrd aǵash otyrǵyzý jónindegi tapsyrmasyna sáıkes 2021-2025 jyldarǵa arnalǵan BQO ormandardy molyqtyrý jáne orman ósirý kólemin ulǵaıtýdyń keshendi jospary bekitildi. Ótken jyly 2 225 gektar jer kóleminde aǵash egý jumystary kózdelip, ol 1 943 gektarǵa oryndaldy. Oryndalmaı qalǵan 282 gektar jerge bıyl aǵash otyrǵyzý josparlanýda», - dedi Nurlan Saǵyntaıuly.
Onyń sózine qaraǵanda, 2022 jyly Úkimettiń qaýlysymen «Bókeıorda» tabıǵı rezervaty quryldy. Onyń kólemi – 343 myń ga, soǵan qarasty «Aşyózek» tabıǵı qaýmalynyń aýmaǵy – 314 myń, barlyǵy 657 myń gektardy quraıdy. Qazirgi kezde rezervatta 80 shtat bar. Qujattary rettelip, bastapqy jumys atqarýǵa qajetti tehnıkalarmen qamtamasyz etilip, rezervat qyzmetterin bastap ketti.
«Rezervattyń negizgi mindeti – tek qana kıik qorǵaý emes. Sonymen qatar erekshe ekologııalyq, ǵylymı, tarıhı-mádenı jáne rekreatsııalyq mańyzy bar geologııalyq, gıdrogeologııalyq, zoologııalyq, botanıkalyq jáne landshafttyq nysandar men olardyń keshenderin saqtaý mańyzdy. Sol sekildi sýly-batpaqty alqaptardy, negizgi ornıtologııalyq aýmaqtardy, biregeı tabıǵı sý qoımalaryn nemese olardyń ýchaskelerin, ósimdikter men janýarlardyń sırek kezdesetin jáne joıylyp ketý qaýpi tóngen túrlerin qorǵaý kerek. Oǵan qosa ekologııalyq mańyzy bar týrızmdi jetildirý jáne ǵylymı jumystardy júrgizý rezervattyń mindetine jatady», dedi N.Rahymjanov.