Batys Qazaqstanda jasóspirimderdiń úıden ketýi jıilep otyr
BQO polıtsııa departamentiniń baspasóz qyzmetinen málim etkenindeı, jyl basynan beri oblys boıynsha jasóspirimderdiń iz-túzsiz joǵalyp ketkeni týraly 54 habarlama tirkelip, bir táýlik ishinde olardyń ornalasqan jeri anyqtalyp, olar zańdy ókilderine qaıtarylǵan.
Sonyń ishinde 23-i 5-12 jastaǵy balalar bolsa, 31-i – 13-17-degi jasóspirimder.
Departamentten túsken málimetke qaraǵanda, kóbinese áleýmettik az qamtylǵan otbasynan shyqqan balalar joǵalyp ketedi. Kámeletke tolmaǵandardyń ketýiniń negizgi sebepteri – ata-anasymen janjaldasýy, olarmen birge turýdy qalamaýy, úıde únemi ishimdiktiń ishilýi.
«Habar-osharsyz ketkenderdi izdeý úshin dereý izdestirý toptary qurylady, qajet bolǵan jaǵdaıda ulttyq ulannyń áskerı qyzmetkerleri, qyzmettik ıtterimen kınologter, eriktiler tartylady. Ár derek boıynsha izdestirý jumystary júrgizilip, áleýmettik jelilerde fotosýretteri jarııalanyp, olardyń bolýy múmkin oryndar men baspanalar, sondaı-aq eriktilermen birge iri saýda jáne oıyn-saýyq ortalyqtary men kompıýterlik klýbtar tekseriledi. Tintý kezinde baqylaý kameralary kómektesedi, qajetti kýágerler, júrgizýshiler, taksı júrgizýshileri, dúken satýshylary, qyzmetkerleri suralady.
Aıta keteıik, mundaı balalardyń ata-analary QR Ákimshilik quqyq buzýshylyq kodeksi 442-babyna (kámeletke tolmaǵandardyń zańdy ókilderiniń erip júrýinsiz túngi ýaqytta oıyn-saýyq mekemelerinde nemese turǵynjaıdan tys jerde bolýy) sáıkes ákimshilik jaýapkershilikke tartylady.
Ata-ana tarapynan baqylaýdyń bolmaýy qaıǵyly oqıǵaǵa soqtyrýy ábden múmkin. Eger bala tártipke baǵynbaı, oqýdan bas tartsa nemese uzaq ýaqytqa úıden ketip qalatyn ádet tapsa, keńes alý úshin BQO polıtsııa departamenti jergilikti polıtsııa qyzmeti basqarmasy ıývenaldy polıtsııa bólimine habarlasýǵa bolady», - dep habarlady vedomstvodan.
Eske sala keteıik, budan buryn Oralda 13 jasar qyzdy zorlaǵan degen kúdikpen taǵy bir adamnyń ustalǵanyn jazǵan bolatynbyz. Bul oqıǵa boıynsha kúdiktiler qyzdy páterge aldap shaqyryp alǵan.
Sondaı-aq, Oralda 3 jasar balanyń balabaqshadan qashyp ketýine baılanysty tárbıeshi jumysynan bosatyldy.
