Batys Qazaqstanda jańajyldyq is-sharalardy ótkizý shekteledi

ORAL. QazAqparat – Batys Qazaqstan oblysynda JRVI men tumaýdyń jıileýine baılanysty merekelik is-sharalardy ótkizý shekteledi. Bul týraly óńirlik kommýnıkatsııalar qyzmeti alańynda ótken brıfıngide BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaev málim etti, dep habarlaıdy QazAqparat tilshisi.

M. Aryspaevtyń aıtýynsha, ásirese, balabaqshalar men mektepterde barlyq kópshilik is-sharalarǵa shekteý qoıylady.

«Sonymen qatar meıramhana ıelerinen jańajyldyq kooperatıvterdi ótkizýden bas tartýdy usynamyz. Mundaı is-sharalardan keıin adamdardyń kóp jınalýy saldarynan indettiń qaıta órship ketýi múmkin. Onyń ústine kórshiles Reseıde omıkron shtamy tabylyp otyr. Sondyqtan barlyq sanıtarlyq talaptardy saqtap, aldaǵy merekelelik is-sharalardy turǵyndardyń óz otbasylarynda ótkizýi kerek dep esepteımiz», dedi M.Aryspaev.

Onyń sózine qaraǵanda, oblysta 1 jeltoqsannan beri 143 adamnyń koronavırýs juqtyrǵany anyqtaldy.

Sońǵy aptada (3-9 jeltoqsan) aldyńǵymen (26 qarasha – 2 jeltoqsan) salystyrǵanda, aýrý juqtyrý kórsetkishi 6,7 paıyzǵa tómendedi.

Osy aıda 21 oqýshy, 7 muǵalim, JOO-da 2 stýdentten indet tabyldy.

«Omıkron» shtamy álemniń 57 elinde anyqtaldy. Sonyń ishinde Reseıde eki adamnyń aýyrǵany tirkeldi. Oblysqa Mysyrdan 9, Londonnan 2 jáne Germanııadan 1, barlyǵy 12 QR azamaty keldi. Kúni búgin olardyń barlyǵy turǵylyqty jeri boıynsha baqylaýǵa alyndy. Izraıl, Chehııa, Nıderlandy, Ulybrıtanııa, Italııa, Germanııa, Aýstralııa, Kanada, Belgııa jáne Mysyrdan kelgen azamattar COVID-19-ǵa qarsy vaktsınatsııalaýdyń tolyq kýrsynan ótken-ótpegendigine qaramastan, memlekettik shekaradan ótken sátte PTR anyqtamasyn usynýy mindetti. Oblysta «Omıkron» shtamy tirkelgen joq. Osy jaǵdaıǵa baılanysty epıdemıologııalyq qadaǵalaý júıesinde SARS-COV-2 jańa nusqalaryn ýaqtyly anyqtaýdyń mańyzdylyǵyn eskere otyryp, KVI naýqastarynyń oń nátıje synamalary Nur-Sultan qalasyndaǵy «Ulttyq saraptama ortalyǵyna» jiberildi. Bular tekserilý ústinde», dedi M.Aryspaev.

Óńirde JRVI-men syrqattanýshylyq 2,4 esege (2020 jyly – 8143, 2021 jyly – 20 124) ósken. Sondaı-aq 1 qarashadan beri 81 turǵynnyń tumaýdyń A (H3N2) túrimen aýyrǵany belgili boldy. Ótken 2020-2021 jylǵy epıdemıologııalyq maýsymda tumaýmen aýyrǵandar tirkelmegen edi.

Eske sala keteıik, budan buryn Batys Qazaqstanda koronavırýs juqtyrý kórsetkishi 16,4 paıyzǵa azaıǵanyn jazǵan bolatynbyz.