Batys Qazaqstanda jańadan dene shynyqtyrý-saýyqtyrý kesheni ashyldy

ORAL. QazAqparat – Táýelsizdiktiń 30 jyldyǵy men Elorda kúnine oraı Terekti aýdany Podstepnyı aýylynda sáýletti dene shynyqtyrý-saýyqtyrý kesheni ashyldy, dep habarlaıdy QazAqparat tilshisi.

Jańa keshende bir mezgilde 100-den astam bala jattyǵa alady. Keshkisin jáne demalys kúnderi salamatty ómir saltyn ustanatyn turǵyndar úshin de sport zaldary ashyq bolmaq.

Ǵımarattyń ashylý rásimine qatysqan oblys ákiminiń birinshi orynbasary Muhtar Mankeev Elbasy tapsyrmasyna sáıkes 2019-2020 jyldary barlyq aýdan ortalyqtary men iri aýyldarda 9 dene shynyqtyrý-saýyqtyrý keshenin salý qolǵa alynǵanyn jetkizdi.

Sonyń biri – Oralǵa irgeles ornalasqan Podstepnyı aýylyndaǵy osy sport saraıy.

Jańa keshen kóptegen ataqty sportshylar shyqqan Terekti aýdanyna tyń serpin beretin bolady.

Jańa keshende sport jáne trenajer zaldary bar, onda kelýshiler voleıbol, basketbol, shaǵyn fýtbol, qazaq kúresi, erkin kúres, dzıýdo syndy sport túrlerimen aınalysa alady.

Munda sondaı-aq múmkindigi shekteýli jandar úshin de jaǵdaı jasalǵan. Medıtsınalyq kabınet, kúres zaldary, 160 oryndyq kórermen zaly da bar.

Atalmysh nysan «QPO b.v.» kompanııasynyń óńirdiń áleýmettik jobalaryna baǵyttalǵan qarjysy esebinen boı kóterdi.