Batys Qazaqstanda jańa mýzeı ashyldy
ORAL. QazAqparat - Táýelsizdik meıramyna oraı Shyńǵyrlaý aýdanynda jańa mýzeı ashyldy, dep habarlaıdy «QazAqparat» tilshisi.
Bıyl eski ǵımaratty qaıta jóndeý úshin bıýdjetten 58 mln teńge bólindi. Bul jumystardy «Órkenservıs» JShS (dırektory Berik Nurmuhanov) atqaryp shyqty.
Jańa mýzeıde (dırektory Tilegen Qalıev) arheologııa jáne ekologııa, aýdan tarıhy, «Rýhanı jańǵyrý», Táýelsizdik jáne qazirgi zamanǵy shyǵarmashylyq zaly bar. Ǵımaratta jádigerlerdi saqtaý úshin barlyq jaǵdaı jasalǵan, mýzeı Led-ekranmen jabdyqtalǵan.
Kúni búgin mýzeıde 3 myńdaı eksponat bar.
Mýzeıdiń ashylý rásimine oblys ákiminiń orynbasary Bıbigúl Qonysbaeva qatysyp, aýdan turǵyndarynyń qýanyshyna ortaqtasty.
Aýdan ákimi Albert Esálıevtiń aıtýynsha, «Rýhanı jańǵyrý» baǵdarlamasy aıasyndaǵy jumystar budan keıin de jalǵasatyn bolady.
Táýelsizdik kúnine oraı Shyńǵyrlaý aýdanynda 39 jańa páter de paıdalanýǵa berildi. Segizsaı, Lýben, Belogor, Poltava eldi mekenderinde bıýdjettik mekeme qyzmetkerlerine arnalǵan 4 eki páterlik, sondaı-aq aýdan ortalyǵynda 31 bir páterlik turǵyn úıler boı kóterdi. «Nurly jer» baǵdarlamasyna sáıkes bul maqsatqa oblystyq bıýdjetten 270,324 mln teńge bólinip, negizgi jumystardy bas merdiger «Batyskotlomontaj» JShS (dırektory Damır Balmoldın) atqardy.
Eske sala keteıik, keshe Oral qalasynda «Rýhanı jańǵyrý» mýzeıi de ashylǵan bolatyn.
