Batys Qazaqstanda jańa mektep paıdalanýǵa berildi

ORAL. QazAqparat – Respýblıka kúnine oraı Báıterek aýdany Şapov aýylynda Baýyrjan Momyshuly atyndaǵy 420 oryndyq jańa mektep ǵımaraty paıdalanýǵa berildi, dep habarlaıdy QazAqparat tilshisi.
None

Osyǵan deıin atalǵan mektep oqýshylary 1974 jyly salynǵan 120 oryndyq eski ǵımaratta bilim alyp kelgen edi.

Ótken jyly Baýyrjan Momyshulynyń esimi berilgen mektep qurylysyna memleket bıýdjetinen 1 191,07 mln teńge bólindi. Jańa ǵımaratty «Otdelstroı» qurylys-kommertsııalyq fırmasy» JShS sapaly salyp bitirdi.

Jańa mekteptiń ashylý rásimine qatysqan oblys ákiminiń orynbasary Baqytjan Narymbetovtiń atap ótkenindeı, endi jas jetkinshekter zamanaýı úlgide salynǵan ǵımaratta bilim alady.

«Óńirde qyrkúıek aıynan beri 1 memlekettik, 1 jeke menshiktegi mektep ashyldy. Mine, sonyń qataryna taǵy bir bilim ordasy qosylyp otyr. Buǵan qosa jyl sońyna deıin birqatar áleýmettik nysan paıdalanýǵa berilmekshi. Munyń bári – memleket tarapynan jas urpaqtyń jarqyn bolashaǵy úshin jasalyp otyrǵan ıgi ister. Batyr babamyzdyń esimi berilgen bilim ordasynan tálim-tárbıe alǵan balalar elimizdiń mereıin ósirip, abyroıyn asyrar azamaty bolaryna senemin», dedi Baqytjan Haberuly.

Onyń sózine qaraǵanda, mektep tolyqtaı jańa tehnıkalyq qural-jabdyqtarmen jabdyqtalǵan. Smart synyp, keń akt zaly, sport zaly, ashana, sheberhanalary bar. Mektep aýlasynda birneshe sport alańy oryn tepken.

Mektep ujymy oqý-tárbıe úrdisine ınnovatsııalyq ádis-tásilderdi engizýmen qatar, «Baýyrjantaný», «Tsıfrly muǵalim», «Dombyra party», «STEAM», «Eko mektep», «Oqýǵa qushtar mektep», Debat «Aqıqat» jobalarymen jumystanýda. Sondaı-aq elimizdegi Baýyrjan Momyshuly atyndaǵy mekteptermen jelilik baılanys ornatqan.

Shara barysynda «Baýyrjan mektebi» atty ánurannyń (sózin jazǵan aqyn, jýrnalıst Munaıdar Balmolda, ánin jazǵan mýzyka pániniń muǵalimi Eleonora Soldatova) tusaýy kesildi.

Saltanatty jıynda «Otdelstroı» qurylys-kommertsııalyq fırmasy» JShS basshysy Valentına Mıhno ıgi tilegin bildirip, mektep dırektory Aımeken Baqtyǵalıevaǵa bilim ordasynyń beıneli kiltin tabys etti.


Сейчас читают