Batys Qazaqstanda jańa dene shynyqtyrý-saýyqtyrý kesheni ashyldy
ORAL. QazAqparat – BQO-nyń Jańaqala aýdanynda 160 oryndyq dene shynyqtyrý-saýyqtyrý kesheni paıdalanýǵa berildi, dep habarlaıdy QazAqparat tilshisi.
Onyń ashylý rásimine qatysqan oblys ákimi Ǵalı Esqalıev Qazaqstan Prezıdenti Qasym-Jomart Toqaevtyń tapsyrmasyna sáıkes óńir aýdandarynda osyndaı keshenderdiń salynyp jatqandyǵyn atap ótti.
«Ár memleket sportpen aınalysqy keletin adamdarǵa tolyq jaǵdaı jasaýy kerek. Ásirese, jas urpaqtyń deni saý, rýhy bıik bolyp ósse, el bolashaǵy da jarqyn bola túspek. Osyny
eskere otyryp, budan bir jyl buryn Memleket basshysy oblystyń ár aýdanynda zamanaýı sport keshenin salýdy tapsyrǵan bolatyn. Qazirgi tańda birden alty aýdanda, atap aıtqanda, Aqjaıyq, Bókeı ordasy, Jánibek, Qaztalov, Terekti jáne Shyńǵyrlaýda osyndaı ǵımarattar boı kóterýde. Búgin Jańaqalada jańa keshenniń paıdalanýǵa berilýi dańqty sportshy-bapkerleri bar, dástúri baı aýdanda sportty odan ári damytýǵa múmkindik beredi», dedi óńir
basshysy.
Shara barysynda osy keshen qurylysyna qarjy bólgen «QPO b.v.» kompanııasy men merdiger mekeme – «Jaıyq selstroı» JShS atyna alǵys aıtyldy.
Jańa keshenniń lentasyn oblys ákimimen birge aýdan maqtanyshy, sambodan jastar arasynda álem chempıony Erasyl Baqyt qıdy.
Jalpy aýdany 991 sharshy metrdi quraıtyn, 160 orynǵa eseptelgen sport kesheninde voleıbol, basketbol, fýtzal oıyn túrlerine arnalǵan sport zaly, jekpe-jek sport túrlerine arnalǵan zal jáne shaǵyn jattyǵý zaly turǵyndarǵa qyzmet kórsetetin bolady.
Aıta keteıik, Jańaqalada aýdandyq balalar-jasóspirimder sport mektebiniń ǵımaraty kúrdeli jóndeýden ótkizilýde.
