Batys Qazaqstanda úzdik mektep túlekterine qurmet kórsetilýde

ORAL. 21 maýsym. QazAqparat -  21 maýsym kúni Qaratóbe aýdany ákimi Naýryzbaı Qaraǵoıshın UBT qorytyndysynda úzdik nátıje kórsetip, «Altyn belgi» ıegerleri atanǵan, sonymen birge synaq barysynda 100-den joǵary ball jınaǵan túlekterdi jáne 9 synypty «Úzdik kýálikpen» bitirýshilerdi qabyldap, saltanatty shara ótkizdi.

Onda aýdan basshysy túlekter men mektep órenderine jarqyn bolashaq tiledi. Aýdan boıynsha úkilegen úmitti aqtaǵan Qaratóbe mektep-gımnazııasynyń túlekteri, «Altyn belgi» ıegerleri Sátjan Ǵabdollaev, Áıgerim Erlanova, Nurdáýlet Shaımardanovqa «Altyn belgi» lentasy men  tósbelgi taǵylyp, noýtbýk tartý etildi.

«Altyn belgi» ıegerleriniń ata-analary da nazardan tys qalmaı, oblys ákimi N. Noǵaevtyń atynan joldanǵan alǵyshatqa ıe boldy.

Aýdandyq máslıhat hatshysy Batyrǵalı Toıshybaev, «Altyn belgi» ıegeri, Qaratóbe mektep-gımnazııasynyń túlegi Nurdáýlet Shaımardanov, ata-analar atynan Erlan Násipqalıevter sóz sóılep, aýdannyń bilim berý salasynda jetistikterdiń kóp bolýyna tilektestikterin bildirdi.

Osyndaı sharalar oblystyń ózge aýdandary men Oral qalasynda da uıymdastyrylyp otyr.