Batys Qazaqstanda úıdiń qabyrǵasyna Jáńgir hannyń beınesi salyndy
ORAL. QazAqparat – Bókeı ordasy aýdanynyń ortalyǵy Saıqyn aýylynda qos qabatty úıdiń qabyrǵasyna Jáńgir hannyń beınesi salyndy, dep habarlaıdy QazAqparat tilshisi.
Ortalyq kóshedegi úıdi qabyrǵasynda Jáńgir hanmen birge toǵaı men Han ordasy mýzeı-qoryǵynyń sýretteri de kórinis tapty.
Mýraldyń avtorlary – oraldyq sýretshiler ıAkov pen Darıa Polışýk.
Aýdan ákimi Nurlan Rahymjanovtyń aıtýynsha, Bókeı handyǵynyń qurylǵanyna 2021 jyly 220 jyl, Jáńgir han mektebine 180 jyl tolmaqshy.
Bókeı sultan qolastyndaǵy halqymen birge 1801 jyly Edil-Jaıyq aralyǵyna ótip, handyqtyń negizin qalap, 1815 jylǵa deıin basqardy. Onyń uly Jáńgir han Jasqus qumyna óz ordasyn saldyryp, qaraýyndaǵy eldi otyryqshy ómirge, eýropalyq órkenıetke úndep, sol baǵytta kóptegen ister tyndyrdy.
«Aýdan ortalyǵyndaǵy Jáńgir han beınesi – osy mereıtoılar qarsańyndaǵy bastapqy jumystardyń biri», dedi QazAqparat tilshisine N.Rahymjanov.
Eske sala keteıik, budan buryn Aqsaıda toǵyz qabatty úıdiń qabyrǵasynda Abaı beınelengenin jazǵan bolatynbyz.
