Batys Qazaqstanda úsh jeńil kólik qar qursaýynda qaldy
ORAL. QazAqparat – Batys Qazaqstan oblysynda úsh jeńil kólik qar qursaýynda qaldy, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 5 naýryz kúni Qaratóbe aýdanynda boldy.
Qaratóbe-Qaldyǵaıty tas jolynda Qaratóbe aýylynan 22 shaqyrym jerde úsh jeńil kólik qar qursaýynan shyǵa almaı, qalyp qoıǵan.
Saǵat 04.00-de TJD kúshimen (5 qyzmetker, 1 tehnıka) jeńil kólikterdegi 11 adam Qaratóbe aýylyna evakýatsııalandy. 11 adamnyń bireýi – bala. Olar medıtsınalyq kómekti qajetsinbedi.
BQO TJ departamenti búgin respýblıkalyq mańyzy bar Samara-Shymkent jolynyń ashyq, al Oral-Tasqala-RF shekarasy trassasy jabyq ekendigin jetkizdi.
Eske sala keteıik, budan buryn Oralda balalar mingen 2 mektep avtobýsy qar qursaýynda qalǵanyn, BQO trassasynda júk kóliginiń tirkemesi janyp ketkenin jazǵan bolatynbyz.
