Batys Qazaqstanda úsh ormandy sharpyǵan órtti tikushaqpen sóndirip jatyr
BATYS QAZAQSTAN OBLYSY. QazAqparat – Tótenshe jaǵdaılar komıteti Batys Qazaqstannyń Aqjaıyq aýdanynda orman órti qalaı sóndirilip jatqanyn aıtty, dep habarlaıdy QazAqparat.
«Osy jyldyń 13 shildesinde saǵat 23:50-de BQO Aqjaıyq aýdany Býdarın aýyldyq okrýginde Kolovertnoe kentinen 10 shaqyrym qashyqtyqta, «Býdarın orman sharýashylyǵy» QMM aýmaǵynda 16 gektar aýmaqta orman órtengen. Órtti sóndirýge TJD, Apat medıtsınasy ortalyǵy, Býdarın orman sharýashylyǵy, erikti órt sóndirý qurylymdarynan 93 adam, 11 tehnıka tartyldy. Sondaı-aq, Atyraý qalasynan shaqyrylǵan TJK «Qazavıaqutqarý» AQ MI-884 tikushaǵy 14-15 shilde kúnderi 39 ret 195 tonna sý shashty. Tótenshe jaǵdaı bolǵan aımaqty áýeden baqylap jatyr. Qazirgi ýaqytta órtti tolyq sóndirý sharalary qoldanylýda. Órt bolǵan aımaq qorshaýǵa alyndy», - dep habarlady komıtetten.
TJD men orman sharýashylyǵy kúshteri oqshaýlanyp qalǵan órt oshaqtaryn sóndirip jatyr. Osy sharalardyń arqasynda 14 shilde 19:02-de órt sóndirildi.
Órtti sóndirýge qurǵaq ystyq kún raıy men aýa temperatýrasynyń +41ºS-qa jetýi kedergi keltirgen. Órttiń shyǵý sebebi - ormanǵa jaı túsken.
TJD krızıs ortalyǵynda órt sóndirý jáne onyń saldaryn joıý jedel shtaby táýlik boıy jumys istep jatyr. Jaǵdaı baqylaýǵa alynǵan.
«Sondaı-aq, BQO Aqjaıyq aýdany «Chapaev orman sharýashylyǵy» QMM jáne «Esensaı orman sharýashylyǵy» QMM aýmaǵynda orman men qurǵaq shóp órtenip, ony sóndirý jumystary júrip jatyr. Órt aýyzdyqtaldy. Oǵan TJD, orman sharýashylyǵy, erikti órt sóndirý qurylymdarynyń kúshi men quraldary jumyldyryldy», - dedi QR ІІM TJK baspasóz qyzmetinen.
Eske sala keteıik, biz keshe Batys Qazaqstan oblysynda ormannan shyqqan órt aýylǵa kirip, 40-tan astam adam evakýatsııalanǵanyn jazǵan bolatynbyz.
