Batys Qazaqstanda turǵynǵa kúsh kórsetken polıtsııa qyzmetkeri qyzmetinen bosatyldy
ORAL. QazAqparat - Bórli aýdany Ýspenov aýylynda turǵynǵa kúsh kórsetken ýchaskelik polıtsııa ınspektory Samat Jaımaǵambetov qyzmetinen bosatyldy, dep habarlaıdy «QazAqparat» tilshisi.
BQO ІІD bastyǵynyń orynbasary, polıtsııa podpolkovnıgi Baǵdar Ábýovtiń aıtýynsha, buǵan deıin S.Jaımaǵambetovtiń jergilikti turǵyn Edýard Muqashevqa qatysty kúsh kórsetip, onyń qolyna kisen salyp, uryp-soqqany jóninde beınejazba áleýmettik jelide taralǵan bolatyn. Osy oqıǵaǵa baılanysty departament bastyǵy, polıtsııa general-maıory Maqsuthan Ábilázimov Bórli aýdanyna arnaıy baryp, jeke qurammen kezdesý ótkizdi. Atalǵan derek boıynsha qyzmettik tekserý júrgizilip, nátıjesi ishki ister departamentiniń tártiptik komıssııasynda qaralyp, S.Jaımaǵambetovti ishki ister organdary qatarynan shyǵarý týraly sheshim qabyldandy.
Aıta keteıik, qazirgi kezde S.Jaımaǵambetovke qatysty qylmystyq is qozǵalyp, tergeý amaldary júrgizilýde.
Bul - Bórli aýdanynda bıyl oryn alyp otyrǵan osymen ekinshi oqıǵa. Buǵan deıin Aqsaı qalasynda mas kúıinde turǵyn úılerdiń aýlasynda dáret syndyryp, jolda jatyp qalǵan polıtsııa qyzmetkeri jumysynan bosatylǵan bolatyn.
