Batys Qazaqstanda turǵyndardyń 98,6 paıyzy tabıǵı gazben qamtylmaq
BQO energetıka jáne turǵyn úı-kommýnaldyq sharýashylyq basqarmasy turǵyn úı sharýashylyǵyn jańǵyrtý jáne gazdandyrý bóliminiń basshysy Tilek Kereevtiń aıtýynsha,
óńirdi gazdandyrý baǵytynda naqty jobalar júzege asyrylýda.
Terekti aýdanynda 10 aýylǵa (Donetsk, Bogdanov, Prıdorojnyı, Alǵabas, Sársenov, Shóptikól) gaz qubyryn tartý úshin 237,634 mln teńge qarastyryldy. Sonyń ishinde respýblıkalyq bıýdjetten 176 mln teńge, jergilikti qazynadan 61,5 mln teńge bólindi. Qurylys-montaj jumystaryn osy aıda aıaqtaý kózdelip otyr.
Munyń aldynda Jumyspen qamtýdyń jol kartasy aıasynda osy aýdannyń Dolınnyı, Tóńkeris, Qonyssaı aýyldaryna 337 mln teńgege gaz jetkizildi.
T.Kereevtiń sózine qaraǵanda, Jumyspen qamtýdyń jol kartasy aıasynda sondaı-aq Aqjaıyq aýdanynyń jeti aýylynda (Tegisjol, Jańajol, Qaraǵaı, Toǵan, Jambyl, Úshtóbe, Bitik) aýylishilik gaz qubyryn tartý jáne áleýmettik nysandardy gazdandyrý úshin 227 mln teńge
qaraldy. Bul jumystardy aıaqtaý úshin qosymsha 73 mln teńge qajet.
Sol sekildi osy aýdannyń Sarman, Bıtileý, Aqbulaq, Esim aýyldarynda aýylishilik jeli qurylysy men áleýmettik nysandardy gazdandyrýǵa jergilikti bıýdjetten 105 mln teńge jumsaldy. Bul joba márege jetip, 800-deı adam tabıǵı gazǵa qol jetkizdi.
«Oblysta jyl saıyn kógildir otyndy tutynýshy turǵyndar sany kóbeıip keledi. Barlyq jobalar júzege asyrylǵan kezde bıylǵy jyl qorytyndysymen óńir turǵyndarynyń
tabıǵı gazben qamtylý kórsetkishi 98,6 paıyzǵa jetedi», dedi T.Kereev.