Batys Qazaqstanda turǵyn úı órtenip, bir otbasy baspanasyz qaldy
ORAL. QazAqparat – Batys Qazaqstan oblysynda turǵyn úı órtenip, bir otbasy baspanasyz qaldy, dep habarlaıdy QazAqparat tilshisi.
BQO TJ departamenti memlekettik órt baqylaý basqarmasynyń bastyǵy, azamattyq qorǵaý maıory Mereke Jumaǵalıevtiń málim etkenindeı, oqıǵa 2 sáýir kúni Aqjaıyq aýdany Chapaev aýylynda boldy.
Saǵat 20.07-de Şýrıhın kóshesi 12-mekenjaıynda jeke turǵyn úıdiń janyp jatqany jóninde habar túsken.
Aýmaǵy 80 sharshy metr turǵyn úı, soǵan japsarlas ornalasqan 48 sharshy metr garaj jáne Lifan avtokóligi órtengen.
Jalpy aýmaǵy 128 sharshy metrdi qamtyǵan «tilsiz jaýdy» aýyzdyqtaýǵa jeke quramnan 11 adam 2 tehnıkamen jumyldyryldy.
Órt saǵat 20.47-de oqshaýlanyp, 21.28-de tolyqtaı sóndirildi.
Aýyl adamdarynyń sózine qaraǵanda, bir otbasynyń búkil dúnıe múlki men qujattary túgel janyp ketken.
Qazirgi kezde turǵyndar Azbantaevtar otbasyna qoldaý kórsetip, esepshotqa qarjy aýdarýda.
