Batys Qazaqstanda tuman túsip, kóktaıǵaq bolady
ORAL. QazAqparat - «Qazgıdromet» RMK BQO fılıalynyń málimetine qaraǵanda, 24 aqpan kúni oblystyń keı jerlerinde jaýyn-shashyndy bolyp, tuman túsip, kóktaıǵaqqa ulasady. Oǵan qosa ońtústik-batystan soǵatyn jeldiń jyldamdyǵy sekýndyna 15-20 metrge deıin jetedi, dep habarlaıdy «QazAqparat» HAA tilshisi.
Oral qalasynda da kún jaýyn-shashyndy bolyp, jeldiń jyldamdyǵy sekýndyna 18 metrge deıin kúsheımek.
Osyǵan oraı BQO TJ departamenti turǵyndar arasynda tótenshe jaǵdaılardy boldyrmaý, ómirlik mańyzy zor nysandardyń irkilissiz jumysyn qamtamasyz etý maqsatynda eskertý jarııalady.
Eske sala keteıik, budan buryn 2-3, 5, 15-16 jáne 19-21 aqpan kúnderi jeldiń kúsheıip, burqasyn kóteriletini jóninde eskertý jarııalanǵan bolatyn.
Sońǵy kúnderi Batys Qazaqstanda aýa raıy qubylmaly bolyp tur. Erigen qar sýy qaıta qatyp, muzǵa aınalýda. Sondyqtan, ásirese, joldarda abaılap júrmese bolmaıdy.
