Batys Qazaqstanda tótenshe jaǵdaı zardaptaryn joıýǵa 1,4 mlrd teńge qarastyrylǵan

ORAL. QazAqparat – Batys Qazaqstan oblysynda tótenshe jaǵdaı zardaptaryn joıýǵa rezervte 1,4 mlrd teńge qarastyrylǵan. Bul týraly oblys ákimi Ǵalı Esqalıevtiń tóraǵalyq etýimen ótken apparattyq keńeste aıtyldy, dep habarlaıdy QazAqparat tilshisi.

BQO ákiminiń orynbasary Tilepbergen Kaıýpovtyń málim etkenindeı, Oral qalasy men aýdandar bıýdjetterinde osy maqsatqa tıisti qarjy bólingen, shyǵyndardy jaba alady.

«Tótenshe jaǵdaı jarııalanǵan aýdandarda tıisti komıssııalar qurylyp, jumys jasap jatyr. Úıi sýǵa ketken, maly shyǵynǵa ushyraǵan turǵyndar QR Úkimetiniń arnaıy qaýlysyna sáıkes 30 kún ishinde ótinim jasaı alady. Ol úshin tıisti qujattary bolýy kerek. Al tólem tártibine sáıkes kelmeıtin shyǵyndardy jeke qorlar arqyly óteýge bolady», dedi T.Kaıýpov.

Oblystyq ishki saıasat basqarmasynyń basshysy Darhan Qadyralıev tótenshe jaǵdaı saldarynan zardap shekken turǵyndarǵa qarjylaı qoldaý kórsetý úshin «Aqjaıyq» jeke qorynan arnaıy esepshot ashylǵanyn jetkizdi.

BQO TJ departamentiniń bastyǵy Ernur Ótegenovtiń sózine qaraǵanda, kúni búginge deıin oblys boıynsha 140 úı jáne 2 áleýmettik nysan sýǵa ketti. 168 mal qyryldy.

Sýǵa ketken úılerden 751 adam evakýatsııalansa, sonyń 215-i – balalar.

Qazirgi kezde alty aýdanda sý tasqynymen kúreske 770 adam (99 tehnıka, 7 júzý quraly, 26 motopompa, 1 MI-8 tikushaǵy) jumyldyrylǵan. Mańǵystaý men Atyraý oblystarynan qutqarýshylar kelip, olar da sý basý qaýpi seıilmegen aýmaqtarda jumys jasaýda.

Oral qalasynyń ákimi Abat Shynybekovtiń atap ótkenindeı, 1-saıajaı jáne 2-saıajaı qaýymdastyǵy, teleortalyq aýdanynda ornalasqan saıajaılardy sý basý qaýpi bar.

«Munda 6 myńdaı adam turady. 1300 úı bar. TJ men qala ákimdigi qyzmetkerleri osy saıajaı úılerinde turatyn turǵyndarǵa jadynama taratyp, eskertti», dedi qala basshysy.

Oblys ákimi Ǵ.Esqalıev kóktemgi sý tasqynynyń aldyn alý jumystary jasalǵanyn, degenmen Tasqala, Báıterek aýdandary men Oral qalasynda baqylaýdy kúsheıtý qajettigin aıtty.

«Keıbir aýyldar buryn-sońdy bolyp kórmegen tabıǵı apatqa ushyrady. Turǵyndarǵa memleket tarapynan jáne demeýshiler esebinen kómekter kórsetiledi. Búlingen nysandar qalpyna keltiriledi. Mysaly, Shyńǵyrlaý aýdany Almaz aýylyna kireberis kópirdi qaıta salý jóninde «QazAvtoJol» kompanııasyna tapsyrma berildi», dedi óńir basshysy.

Eske sala keteıik, budan buryn BQO-da 2 júkti áıel sý basqan aýmaqtan tikushaqpen Oralǵa jetkizilgenin, respýblıkalyq mańyzy bar taǵy bir trassany sý basqanyn jazǵan bolatynbyz.

Sondaı-aq BQO-da sý tasqynynan zardap shekkenderge kómek kórsetetin volonterlik shtab quryldy.