Batys Qazaqstanda tótenshe oqıǵalar sany 28,5 paıyzǵa kóbeıip ketken
ORAL. QazAqparat - Batys Qazaqstan oblysynda tótenshe oqıǵalar sany 28,5 paıyzǵa kóbeıip otyr, dep habarlaıdy QazAqparat tilshisi.
BQO TJ departamentinen túsken málimetke qaraǵanda, ótken jyly osy merzimde tehnogendik jáne tabıǵı sıpattaǵy 14 tótenshe jaǵdaı tirkelse, bıyl munyń sany 18-ge jetti.
Sonyń saldarynan 17 adam zardap shekti, bul ótken jylǵydan (11) 54,5 paıyzǵa kóp. Bıyl 2 adam qaza tapty, ótken jyly osy merzimde 4 adam kóz jumǵan edi.
Oblysta jyl basynan beri 211 órt (2017 jyly osy merzimde - 221) tirkelip, 10 adam (11) zardap shegip, ekeýi (8) qaza tapty.
Jaz shyǵa dala men orman órtiniń kóbeıetini belgili. Bıyldyń ózinde 22 ga aýmaqty sharpyǵan eki orman órti bolyp úlgerdi. Bul rette órt qaýipsizdigin saqtaýdyń mańyzy zor. Osyǵan oraı TJ departamenti jergilikti polıtsııa qyzmetiniń atty vzvody, BQO tabıǵı resýrstar jáne tabıǵat paıdalanýdy retteý basqarmasymen birlese otyryp, halyq kóp jınalatyn týrbaza, Han toǵaıy, jaǵajaı sekildi oryndarda reıd júrgizdi.
Shara kezinde orman alqabynda ruqsat etilmegen ot tutatý jaǵdaıy anyqtaldy. Soǵan baılanysty órt qaýipsizdigi erejesin buzǵan eki adamǵa 24050 teńge kóleminde ákimshilik aıyppul salyndy.
«Mundaı reıdter apta saıyn uıymdastyrylatyn bolady», - dedi QazAqparat tilshisine BQO TJ departamentiniń baspasóz hatshysy Nurgúl Muqanova.
Aıta keteıik, sýǵa shomylý kezinde de adamdar qaýipsizdikti saqtamaı jatady. Sońǵy on jylǵa jasalǵan taldaý kórsetkenindeı, sýǵa ketkenderdiń 35 paıyzy mas kúıinde túskendikten, qaıǵyly jaǵdaıǵa dýshar bolǵan. 39 paıyzy sýda bolý qaýipsizdigi erejesin buzǵandyqtan jáne júzý bilmegendikten, sýǵa ketip qalady. 12 paıyzy eresekterdiń qaraýynsyz qalǵan balalardyń shomylýynan bolady.
