Batys Qazaqstanda tórt myńnan astam túlek mektep bitirdi
ORAL. QazAqparat - Batys Qazaqstan oblysynda bıyl 4414 túlek mektep bitirse, sonyń 1628-i Oral qalasyndaǵy bilim ordalarynyń úlesine tıedi. Oblys ortalyǵyndaǵy Abaı alańynda mektep túlekteriniń dástúrli sherýi boldy, dep habarlaıdy «QazAqparat» tilshisi.
Qaladaǵy barlyq mektep túlekteri ustazdarymen birge Dostyq dańǵylymen júrip ótti. Olardyń qatarynda bolǵan «Altyn belgi», úzdik attestat ıelerine erekshe qurmet kórsetildi. Bıyl qala boıynsha 91 túlek «Altyn belgi» ıegeri atandy.
Mektep túlekterin osynaý qýanyshty oqıǵamen quttyqtaǵan Batys Qazaqstan oblysynyń ákimi Altaı Kólginov Elbasy tapsyrmasyna sáıkes Qazaqstanda, sonyń ishinde óńirde bilim berý salasyna udaıy kóńil bólinip kele jatqanyn jetkizdi. Buǵan dálel - Batys Qazaqstannyń ózinde bıyl «Nurly jol» baǵdarlamasyna sáıkes segiz jańa mektep salynýda. Kúrdeli jóndelip jatqan bilim nysandary da az emes. Bilim alamyn deýshi jastarǵa elimizde barlyq jaǵdaı jasalǵan. Olardyń aldy «Bolashaq» baǵdarlamasy boıynsha shet elderde oqysa, mamandyǵyn durys tańdap, UBT-ny sátti tapsyrǵan túlekter bilim berý granttary arqyly kez kelgen JOO-ǵa túse alady. Osynyń bári eldiń bolashaǵy - óskeleń urpaq úshin jasalýda.
Óńir basshysy halyqaralyq jáne respýblıkalyq pándik olımpıadalar, ǵylymı jobalar baıqaýlarynyń jeńimpazdaryna eskertkish syılyqtar tabys etti. Daryndy balalarǵa arnalǵan oblystyq mamandandyrylǵan mektep-ınternatynyń túlegi Maqsat Bekmaǵambetov, Krýgloozernyı orta mektebine Oleg Sıdorov jáne №41 mektep-lıtseıden Artýr Jamalıev óz sózderinde ómirden óz oryndaryn taýyp, ustazdary men ata-analarynyń senimin aqtaýǵa bar kúshin salatyndyqtaryn bildirdi.
Mereke otshashýmen támamdaldy.
Osyndaı sharalar oblystyń barlyq aýdandarynda uıymdastyryldy.
