Batys Qazaqstanda tórt adamǵa qasqyr shapty

ORAL. QazAqparat – Batys Qazaqstan oblysynda aýylda qasqyr shaýyp, tórt adam zardap shekti. Oqıǵa 7 mamyr kúni Shyńǵyrlaý aýyldyq okrýgine qarasty aýdan ortalyǵynan 15 shaqyrym jerde ornalasqan Shoqtybaı eldi mekeninde boldy, dep habarlaıdy QazAqparat tilshisi.

Shyńǵyrlaý aýdandyq ishki saıasat bóliminen túsken málimetke qaraǵanda, 7 mamyr kúni saǵat 21:30 shamasynda Whatsapp tobynda turǵyndar bir-birine aýylda qasqyr júrgenin habarlap, saq bolý kerektigin eskertedi.

Túz taǵysynyń birneshe turǵynǵa shabýyl jasaǵany anyqtalǵannan keıin er azamattar jınalyp, izdestirip, qasqyrdyń kózin joıǵan. Jyrtqyshtyń basy zertteý jumystaryn júrgizý úshin aýdandyq veterınarlyq stantsııa qyzmetkerlerine tapsyryldy.

Jaraqat alyp, qasqyrdyń tisi tıgen eki er, bir áıel adam jáne bir bala aýdandyq aýrýhanaǵa jetkizildi.

Jalpy, atalǵan eldi meken turǵyndary bıyl budan buryn da birneshe ret 5-7 qasqyr kórgendigin aıtyp, tıisti shara qabyldaýdy suraǵan. Bul týraly 8 mamyr kúni sol Shoqtybaı aýylynda ótken jıynda belgili boldy.

«Tolyq ekpe salynǵan úsh adam ambýlatorlyq em alý úshin úılerine jiberildi. Qoly jaraqattanǵan jasy 50-lerdegi áıel aýrýhanada jatyr. Zertteý qorytyndysyna sáıkes olardyń bári de emdeý kýrsynan ótedi. Oǵan qosa, qasqyrmen baılanysta bolǵan taǵy 6 adamǵa ekpe salyndy»

, - dedi QazAqparat tilshisine aýdandyq aýrýhananyń bas dárigeri Qylysh Jazyqbaev.

Eske sala keteıik, budan buryn Oral turǵyny mas kúıinde polıtsııa pýnktin taspen urǵanyn jazǵan bolatynbyz.