Batys Qazaqstanda toǵyz mektep karantınge jabyldy

ORAL. QazAqparat – Batys Qazaqstan oblysynda toǵyz mektep karantınge jabyldy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamentiniń baspasóz qyzmeti málim etkenindeı, 8 aqpannan beri 7 oqýshy men 6 muǵalimnen koronavırýs tabyldy.

Soǵan baılanysty qalada 4, aýdandarda 5 mektep karantınge jabyldy.

Sondaı-aq Oralda balabaqsha tárbıeshisiniń koronavırýs juqtyrǵany anyqtaldy. Munda sol topqa karantın qoıyldy.

BQO bas memlekettik sanıtar dárigeriniń 8 aqpanda kúshine engen qaýlysyna sáıkes oqýshylar nemese qyzmetkerler arasynan bir adamnan koronavırýs tirkelgen kezde sol mektep túgel ınkýbatsııalyq kezeń aıaqtalǵanǵa deıin, ıaǵnı 14 kúnge karantınge jabylady. Oǵan deıin indet shyqqan synyp qana karantınge jabylatyn.

Óńirde epıdemıologııalyq ahýal áli de turaqsyz bolyp otyr.

8 aqpan kúni 51 adamnan indet anyqtalyp, azaıǵanymen, 9-ynda 84, 10-ynda 87 jaǵdaı tirkeldi.

Eske sala keteıik, budan buryn BQO-da karantın talabyn buzǵandarǵa 3 mln teńgeden astam aıyppul salynǵanyn jazǵan bolatynbyz.