Batys Qazaqstanda táýelsizdik jyldary 162 myńnan astam jańa jumys orny ashyldy

ORAL. QazAqparat – Batys Qazaqstan oblysynda táýelsizdik jyldary 162 myńnan astam jańa jumys orny ashyldy, dep habarlaıdy QazAqparat tilshisi.

BQO jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Isataı Myńbaev óńirlik kommýnıkatsııalar qyzmeti alańynda málim etkendeı, osy kezeńde jumyspen qamtý organdaryna jolyqqandar ishinen 186 myńnan astam adam jumysqa ornalastyryldy.

Sonyń 100 myńy aqyly qoǵamdyq jumystarǵa tartyldy.

27 myń adam áleýmettik jumys oryndarymen qamtylsa, oqý oryndarynyń 21 myńǵa jýyq túlegi aqyly jastar tájirıbesinen ótti.

Sonymen qatar kadrlardy kásibı daıarlaý, qaıta daıarlaý jáne biliktiligin arttyrýǵa 22 myńǵa jýyq adam jiberildi.

I.Myńbaevtyń sózine qaraǵanda, táýelsizdik jyldarynda ekonomıkalyq turǵydan belsendi halyqtyń sany 51,3 myńǵa ósip, qazir 338,4 myńǵa jetti (1991 jyly – 287,1 myń adam).

Jumyspen qamtýdyń tetikterin iske qosý nátıjesinde oblysta jalpy jumyssyzdyq deńgeıi 10,8 paıyzdan 4,9, jastar arasynda 3,8 paıyzǵa deıin (1991 jyly – 26,1 paıyz) tómendedi.

«Aýyldarda shaǵyn kásipkerlikti damytý maqsatynda 8 myńǵa jýyq nesıe, sondaı-aq jumyssyzdardyń bıznes ıdeıasyn iske asyrý maqsatynda 5 myńnan astam adamǵa qaıtarymsyz negizdegi memlekettik granttar berildi. Óńirde halyqty jumyspen qamtý baǵytyndaǵy is-sharalar odan ári jalǵasýda», dedi I.Bekesov.

Eske sala keteıik, budan buryn BQO-da barlyq aýdandardyń sport keshenimen qamtylatynyn jazǵan bolatynbyz.