Batys Qazaqstanda tasqyn sý aýyl shetindegi ótkeldi shaıyp ketti

ORAL. QazAqparat – Batys Qazaqstan oblysynda tasqyn sý aýyl shetindegi ótkeldi shaıyp ketti, dep habarlaıdy QazAqparat tilshisi.

Qaratóbe aýdanynyń ákimi Qadyrjan Súıeýǵalıevtiń málim etkenindeı, oqıǵa 30 naýryz kúni Qarakól aýyldyq okrýgi Aqtaısaı aýylynda boldy.

Ákimniń aıtýynsha, aýa raıy kúrt jylynyp, qardyń erýi saldarynan Taıan ózeni arnasyndaǵy sý kóterilgen. Taıan óz arnasynyń baǵytymen Qýaǵashqa, al Qýaǵash Jaqsybaı ózenine quıady.

«Tasyǵan sý ekpini saǵat 17.20-da Aqtaısaı aýylynyń kireberisindegi Jaqsybaı ózeninen ótetin ótkeldi (60 metr) tolyǵymen buzyp, shaıyp ótti. Tasqynnan eldi mekenge qaýip joq», dedi QazAqparat tilshisine Q.Súıeýǵalıev.

Eske sala keteıik, budan buryn Batys Qazaqstanda aýyl mektebine sý kirgenin jazǵan bolatynbyz.