Batys Qazaqstanda taǵy da joldar jabyldy
ORAL. QazAqparat - Batys Qazaqstan oblysynda taǵy da joldar jabyldy, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, boran soǵyp, jeldiń jyldamdyǵy sekýndyna 20 metrge jetýine baılanysty oblystyq mańyzy bar bes baǵyttaǵy jol boıynsha 27 qańtar kúni jergilikti saǵat 22.00-den bastap osyndaı sheshim qabyldandy.
Atap aıtqanda, Aqsaı-Shyńǵyrlaý, Shyńǵyrlaý-Lýben-Segizsaı, Fedorov-Aqsaı, Tasqala-Aqqýraı-Bolashaq jáne Aqsaı-Jympıty joldarynda barlyq kólik túrleri úshin qozǵalysqa shekteý qoıyldy.
«Osyǵan baılanysty turǵyndarǵa SMS habarlamalar jiberilýde», dep habarlady TJ departamentinen.
Eske sala keteıik, budan buryn óńirde joldar jabylyp, qar qursaýynda qalǵan kólikter sany 184-ke jetkenin, burqasyn men jelge baılanysty eskertý jarııalanǵanyn jazǵan bolatynbyz.
