Batys Qazaqstanda taǵy bir jas jigit sýǵa ketti
BQO TJ departamentiniń baspasóz qyzmetinen málim etkenindeı, oqıǵa 8 shilde kúni Báıterek aýdany Jaıyq aýylynda boldy.
«Saǵat 19.50-de «Orys monshalary» kesheni aýdanynda qutqarýshylar «Karer» jasandy sý qoımasynan 28 jastaǵy turǵynnyń denesin alyp shyqty. Aldyn ala málimet boıynsha marqum mas kúıinde shomylýǵa tyıym salynǵan jerden túsip, saǵat 18.45-te batyp ketken. Qazirgi kezde oqıǵanyń jaı-japsary anyqtalyp jatyr. Sot-medıtsınalyq saraptama taǵaıyndaldy. BQO TJ departamenti turǵyndarǵa sýdaǵy qaýipsizdik erejelerin qatań saqtaý kerektigin eske salady», dep habarlady.
Bul – sońǵy kúnderi Báıterek aýdanynda bolǵan ekinshi oqıǵa. Osyǵan deıin 5 shilde kúni Asan aýylynda 21 jastaǵy jigit «tilsiz jaýdyń» qurbany boldy.
BQO TJ departamenti 9 shildede kúnniń 42 gradýsqa deıin ysıtyny jóninde eskertý jarııalady. Óńirde órt qaýpi de kúsheıip tur.
Eske sala keteıik, budan buryn Batys Qazaqstanda 21 jastaǵy jigittiń Shaǵanǵa batyp ketkenin jazǵan bolatynbyz.
Sondaı-aq Batys Qazaqstanda jol apatynan taǵy eki adam mert boldy.