Batys Qazaqstanda taǵy bir orman órti tirkeldi
BQO TJ departamentiniń baspasóz qyzmeti málim etkenindeı, 17 tamyz kúni saǵat 13.52-de Oralǵa qarasty Melovye gorkı kenti aýmaǵynda 10 gektar jerdiń qurǵaq shóbi men 10 gektar orman otqa orandy.
Tabıǵı órt saldarynan aýmaǵy 20 sharshy metr saıajaı úıin jalyn sharpydy.
«Tilsiz jaý» 18 tamyz kúni jergilikti saǵat 21.26-da TJ departamenti (51 qyzmetker, 8 tehnıka), orman sharýashylyǵy mekemesi (15 adam, 2 tehnıka) jáne «Jaıyq taza qala» JShS (2 adam, 2 tehnıka) kúshimen aýyzdyqtaldy.
Eske sala keteıik, budan buryn Batys Qazaqstanda orman órti kezinde on adam qutqarylǵanyn jazǵan bolatynbyz.
Báıterek aýdany Trekın men Volodar aýyldary arasynda 16 tamyz kúni saǵat 12.55-te bastalǵan órt keıin Terekti aýdany Aqsýat aýylyna aýysty. Barlyǵy 131,1 gektar jer órtense, sonyń 119,7 gektary – orman. Bul órt 17 tamyz kúni saǵat 06.20-da oqshaýlanyp, 18 tamyzda saǵat 17.29-da tolyqtaı sóndirildi. Buǵan TJ departamenti (74 adam, 12 tehnıka), orman sharýashylyǵy mekemesi (24 adam, 2 tehnıka), erikti órt sóndirý qurylymdary (14 adam, 3 tehnıka) jumyldyryldy.
Batys Qazaqstanda kúnniń ystyǵy áli qaıtpaı tur.
Qazgıdromet aldaǵy 3 kúnde Qazaqstannnyń batysynda kún 41 gradýsqa deıin ysıtynyn habarlady.