Batys Qazaqstanda sýǵa ketkenderdiń teń jartysynan astamy – balalar
ORAL. QazAqparat – Batys Qazaqstan oblysynda sýǵa ketkenderdiń teń jartysynan astamy balalar bolyp otyr. Bul týraly brıfıngte BQO Tótenshe jaǵdaılar departamenti bastyǵynyń orynbasary Aqylbek Ahmetjanov málim etti, dep habarlaıdy QazAqparat tilshisi.
Onyń aıtýynsha, bıyl sýǵa túsýge tyıym salynǵan jerlerde 10 adam batyp ketse, sonyń altaýy – balalar.
Eki adam qutqaryldy.
Sýǵa ketkenderdiń beseýi – ata-anasynyń qaraýynsyz qalǵan balalar. Úsh adam mas kúıinde shomylǵan. Bir adam balyq aýlaý kezinde kóz jumsa, taǵy bireýi abaısyzda batyp ketken.
Óńirde kúnniń kúrt ysýyna baılanysty adamdar jappaı sýǵa túsip, 4-8 shilde aralyǵynda 6 adam ajal qushqan. Sonyń tórteýi – balalar.
Sońǵy oqıǵa 8 shilde kúni Terekti aýdany Podstepnyı aýylynda tirkeldi. Saǵat 08.51-de qutqarýshylar Jaıyq ózenine batyp ketken 1989 jylǵy turǵynnyń denesin alyp shyqty. Marqum 7 shilde kúni dostarymen birge bolyp, spırttik ishimdik ishken. Saǵat 22.00-de belgisiz jaǵdaıda sýǵa batyp ketken.
Ótken jyldyń osy kezeńinde 15 adam sýǵa ketse, sonyń ekeýi balalar edi.
«Tótenshe jaǵdaılar departamenti turǵyndardan sýda qaýipsizdik erejelerin qatań saqtaýdy ótinedi», dedi A.Ahmetjanov.
Buǵan deıin Oralda 11 jasar qyz balanyń sýǵa ketkenin jazǵan bolatynbyz.
