Batys Qazaqstanda sýǵa batyp ketken eki adamnyń múrdesi tabyldy
ORAL. QazAqparat - Batys Qazaqstan oblysynda buǵan deıin sýǵa batyp ketken eki adamnyń denesi búgin tabyldy, dep habarlaıdy «QazAqparat» tilshisi.
BQO TJ departamenti Aqjaıyq aýdany №6 jedel qutqarý jasaǵy bóliminiń basshysy Marat Qabaqaevtyń aıtýynsha, osy aýdan ortalyǵy Chapaev aýyly tusynda Jaıyq ózenine 7 tamyz kúni batyp ketken 1999 jylǵy bozbalanyń denesi búgin saǵat 14.20-da shyǵaryldy. Sol sekildi keshe Qaztalov aýdany Tereńkól aýyldyq okrýgine qarasty Mınaj qystaǵy mańynda mal baǵyp júrgen 2001 jylǵy balanyń Saryózenge batyp ketkeni jóninde habar alǵan boıda oraldyq jáne aqjaıyqtyq qutqarýshylar oqıǵa ornyna attandy. Kún keshkirip ketkendikten, keshe súńgýirler bir ret qana qarap úlgerdi. Búgin tańerteń saǵat 06.00-den bastap qaraǵan kezde saǵat 08.20-da bul balanyń da denesi sýdan shyǵaryldy. Mal baǵyp júrip, sý alýǵa kelgen bala ózenge kerilgen jipten ustap ótem degende, jip úzilip ketken.
«Marqumdardyń ekeýi de júzý bilmeıdi eken. Ókinishke qaraı, ózenge sýǵa túskende, adamdar saqtanýdy eskermeıdi. Ózen jaǵalaýlaryn aralap júrip, tańnan keshke deıin qansha aıtsaq ta, adamdar sýǵa túsýge bolmaıtyn, tyıym salynǵan jerde shomylyp jatady. Qaraýsyz júrgen balalar, mas kúıinde túsetinder az emes, eskertý jasasaq, renjıdi. Bizdiń bólim 2011 jyly qurylǵan, keıin sýdan qutqarý men jedel qutqarý jasaǵy biriktirildi. Bizdiń qaraýymyzǵa Aqjaıyq qana emes, Jańaqala, Qaztalov aýdandary da kiredi. Eki kúnniń ishinde qos birdeı jas jetkinshektiń kóldeneń qazaǵa ushyraýy qynjyltyp otyr. Budan buryn bıyl osy aýmaqta mundaı oqıǵa tirkelmep edi», dedi «QazAqparat» tilshisine Marat Qabaqaev.
Eske sala keteıik, osyǵan deıin oblysta tórt adam (sonyń úsheýi - kámeletke tolmaǵandar) sýǵa ketken bolatyn. Búgin olardyń qataryna taǵy eki derek qosylyp otyr. Sonyń kópshiligi - júzý bilmegendikten, sýǵa ketip qalǵan jasóspirimder.
