Batys Qazaqstanda sýarmaly jer alqabyn 50 myń gektarǵa jetkizý kózdelýde
BQO aýyl sharýashylyǵy basqarmasy basshysynyń mindetin atqarýshy Naýryzbaı Qaraǵoıshınniń óńirlik kommýnıkatsııalar qyzmeti alańynda ótken brıfıngide málim etkenindeı, sońǵy jyldary jaýyn-shashyn az túsip, sýdyń tapshylyǵy saldarynan óńirde qýańshylyq oryn alyp keledi.
Onyń aıtýynsha, sol sebepten ósimdik sharýashylyǵynda sýarmaly jer alqabyn ulǵaıtý ózekti máseleniń biri bolyp otyr. Sonymen qatar sýarmaly jerlerde mal azyqtyq daqyldar ósirý de qajet.
Osy maqsatta 2023 jyly – 3,9 myń, 2024 jyly – 13,7 myń, 2025 jyly 25,1 myń gektar sýarmaly jer alqabyn iske qosý josparlanyp otyr
Ótken jyly oblys boıynsha 7 333 ga jer turaqty sýaryldy, bul 2021 jylǵydan (6 623 ga) 710 gektarǵa artyq.
Basqarma basshysynyń mindetin atqarýshynyń sózine qaraǵanda, keıingi jyldary sala kásipkerleriniń zamanaýı sýarý qondyrǵylaryn paıdalanýǵa qyzyǵýshylyǵy artyp keledi. Atap aıtqanda, sońǵy jeti jylda (2015-2022) oblys sharýashylyqtary 4,8 mlrd teńgege 87 jańbyrlatqysh mashına satyp alyp, ony óndiriste qoldanýda. Memlekettik qoldaý sharalary aıasynda 2021 jylǵa deıin 579 mln teńge demeýqarjy berilse, tek ótken jyldyń ózinde 389 mln teńge tólendi. Investıtsııalyq salymdar aıasynda jańbyrlatyp jáne tamshylatyp sýarý júıelerin engizgen jaǵdaıda ınvestıtsııalyq salymdardy óteý úlesi 50 paıyzdy quraıdy. Sonymen qatar sýarmaly jerlerde aýyl sharýashylyǵy daqyldaryn ósirý úshin satyp alynǵan tuqymdar men qoldanylǵan tyńaıtqyshtardyń, pestıtsıdterdiń qunynyń 50 paıyzy bıýdjet esebinen sýbsıdııalanady. 2022 jyly sharýashylyqtar 751,4 mln. teńgege sýbsıdııalandy. Osy baǵdarlamalarǵa tıisti qarajattar jylma-jyl qarastyrylyp keledi. Budan bólek osy baǵyttaǵy jobalardy «QazAgroQarjy» AQ men «Agrarlyq nesıe korporatsııasy» AQ jáne onyń nesıe seriktestikteri qarjylandyrady. 2022 jyly oblys sharýalary 15 jańbyrlatý mashınasyn satyp aldy.
«Osylaısha, sýarmaly jerlerdi ulǵaıtý arqyly daqyldardyń ónimdiligin arttyrý, kepildi ónim jınaý, sý únemdeý tehnologııalaryn keńinen paıdalanýǵa qol jetpekshi. Oǵan qosa osy jer resýrstaryn belsendi ıgerý kezinde kóptegen jumys oryndary ashylady. Bul turǵyndardy jumyspen kóptep qamtýǵa septesedi», dedi N.Qaraǵoıshın.