Batys Qazaqstanda sý deńgeıi kóteriledi
ORAL. QazAqparat - Batys Qazaqstan oblysynyń sý qoımalarynda aldaǵy kúnderi sý deńgeıi kóteriledi. Bul týraly oblys ákimi Altaı Kólginovtiń tóraǵalyǵymen ótken oblystyq sý tasqynyna qarsy shtabtyń kezekti otyrysynda málim boldy, dep habarlaıdy QazAqparat tilshisi.
«Qazgıdromet» RMK BQO fılıaly dırektorynyń orynbasary Danııar Ismýrzınniń aıtýynsha, 31 naýryz - 6 sáýir aralyǵynda kún jylynyp, qar erip, jaýyn-shashynnyń túsýine baılanysty sý deńgeıi kóterilip, tasýy da yqtımal. Sondyqtan saqtyq sharalaryn alý qajet-aq.
BQO TJ departamentiniń basshysy Jasulan Jumashevtiń sózine qaraǵanda, sý tasqyny jaǵdaıyna kún saıyn monıtorıng jasalýda. Kúni búginge deıin 500 myńnan astam tekshe metr qar shyǵarylyp, 17 myńǵa jýyq tekshe metr sý soryldy. Ózenderde muz keptelisi oryn almas úshin 215 myń sharshy metr aýdannan 34346 oıyq oıyldy. Bıyl tıimdi bolǵandyqtan, muzdy jarý emes, kesý jumystary atqarylýda.
Oblysta respýblıkalyq mańyzy bar avtokólik joldaryndaǵy barlyq sý ótkizgish aryqtar tazartyldy. Jergilikti joldardaǵy aryqtardyń 86 paıyzy arshylǵan, bul jumys jalǵasýda. Qazirgi tańda ózenderdegi qaýipti tustar anyqtalyp, olarǵa eki aýysymdyq kezekshilik qoıylǵan. 10 sáýirden bastap TJ departamenti úsh aýysymdyq qyzmet túrine kóshedi.
Óńir basshysy tıisti qyzmetterge, sondaı-aq qala men aýdandar ákimderine kóktemgi sý tasqynyn qaýipsiz ótkizý úshin barlyq sharalardy alýdy tapsyrdy.
