Batys Qazaqstanda sý aıdyndarynda 24 jaǵajaı jumys istemek
BQO TJ departamenti bastyǵynyń orynbasary Qanat Dospaevtyń óńirlik kommýnıkatsııalar qyzmeti alańynda málim etkenindeı, sonyń beseýi kommýnaldyq menshikte bolsa, 19-y – jeke.
Onyń sózine qaraǵanda, Tasqala aýdanynda 1 kommýnaldyq, Shyńǵyrlaýda 1 jeke jaǵajaı jańadan ashylyp otyr.
Departamenttiń qutqarýshylary jergilikti atqarýshy organdardyń ótinimderi boıynsha 23 jaǵajaıdyń túbin tekserip, tazartty.
Oblys ákimdiginiń 2018 jylǵy 14 aqpandaǵy № 22 qaýlysyna sáıkes sý nysandary men sý sharýashylyǵy qurylystarynda jappaı demalýǵa, týrızmge jáne sportqa arnalǵan 69 oryn anyqtaldy, qazirgi ýaqytta naqty ıelerine bekitý jumysy júrgizilýde (jaǵajaılardyń basym bóligi sanıtarlyq-epıdemıologııalyq baqylaý departamentiniń talaptary boıynsha jumys isteýge jatpaıdy).
Sý aıdyndarynyń qaýipti, shomylý úshin jabdyqtalmaǵan ýchaskelerinde 307 tyıym salý belgisi men 77 aqparattyq stend ornatylǵan.
Qanat Qabıbollaulynyń aıtýynsha, 1 maýsymnan bastalatyn shomylý maýsymy kezinde qaýipsizdik talaptaryn saqtaýdyń mańyzy zor. Kanıkýl men demalys ýaqyty bastalysymen jazdyń ystyq kúnderi kóptegen otbasylar balalarymen sýǵa túsýge barady. Ókinishke qaraı, eresekter alkogoldik ishimdik ishedi. Al balalar ata-analarynyń qaraýynsyz sý aıdyndarynda oıyn uıymdastyrady. Munyń sońy qaıǵyly oqıǵalarǵa soqtyrýy yqtımal.
Sońǵy bes jylda oblys boıynsha 102 adam sýǵa ketse, sonyń 28-i – balalar.
Oblys ákiminiń bıylǵy 13 sáýirindegi №104-Ó ókimimen «Oblys sý aıdyndarynda tótenshe jaǵdaılardyń aldyn alý jónindegi keshendi is-sharalar jospary» bekitildi, onyń negizinde sý aıdyndaryndaǵy qaýipsizdikti qamtamasyz etý jónindegi is-sharalar atqarylýda.
Atap aıtqanda, jyl basynan beri 353 reıd uıymdastyrylyp, 11 myńnan astam úgit materıaldary taratyldy. Reıdter barysynda sý aıdyndarynda júris-turys qaǵıdalary túsindirilýde.
Departament bastyǵy orynbasarynyń málimdeýinshe, balalardyń qaýipsizdigin qamtamasyz etý maqsatynda bilim basqarmasyna tıesili 32 ramalyq-modýldik basseın bar, onyń 11-i balalar lagerlerinde (qala syrtyndaǵy), 21-i mektep janyndaǵy lagerlerde jumys isteıtin bolady.
Shomylý maýsymy kezinde tótenshe jaǵdaılardyń aldyn alý úshin 70 qutqarýshy, 20 júzý quraly jáne patrýldeý úshin 12 avtokólik, sonymen qatar 31 súńgýir jabdyǵy daıyndaldy.
Qutqarýshylar sý aıdyndarynyń qaýipti jáne jabdyqtalmaǵan ýchaskelerinde (onyń ekeýi Oral qalasy Jaıyq jáne Shaǵan ózenderinde, bireýi Aqjaıyq aýdany Chapaev kenti Jaıyqta, taǵy bireýi Terektide Shalqar kólinde) patrýldeý uıymdastyrady.
«Adam ólimi negizinen sý aıdyndarynyń jabdyqtalmaǵan jerlerinde oryn alady, onda aǵystyń kúshtiligi, sý astynda shuńqyr men zattardyń bolýy qolaısyzdyq týdyrady. Balalardy qaraýsyz qaldyrý jaǵdaılary jıi kezdesedi. Sondyqtan sýǵa túsken kezde qarapaıym qaýipsizdik qaǵıdalaryn qatań saqtaý kerek», dedi Q.Dospaev.