Batys Qazaqstanda sońǵy tórt kúnde 730-dan astam adamnan koronavırýs anyqtaldy
ORAL. QazAqparat – Batys Qazaqstan oblysynda sońǵy tórt kúnde 732 adamnan koronavırýs anyqtaldy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamenti málim etkenindeı, sonyń 531-inde aýrý belgileri bolsa, 201-i – sımptomy joqtar.
Іndet juqtyrǵandardyń 471-i JRVI belgileri boıynsha tekserilgen, 106-sy buryn aýyrǵandarmen qarym-qatynasta bolǵan. 107-sinen profılaktıkalyq maqsatta, 6 adamnan statsıonarǵa jatqyzar aldynda synama alynǵan.
Tórt kúnde anyqtalǵandardyń 328-i Oral qalasy, 123-i Báıterek, 101-i Bórli, 34-i Terekti, 27-si Aqjaıyq aýdanynyń úlesine tıedi.
Pandemııa bastalǵannan beri óńirde barlyǵy 26188 naýqas tirkelip, sonyń 20735-i jazylyp shyqty. 418-i koronavırýstan kóz jumdy.
Barlyq aýyrǵandardyń 14312-si Oralda, 3295-i Báıterek, 2984-i Bórli, 1078-i Terekti aýdanynda tirkelgen.
Epıdemıolog mamandardyń paıymdaýynsha, indet kózi qoǵamdyq kólikterde, adamdar jıi jınalatyn jerlerde (saýda úıleri, medıtsına uıymdary, qoǵamdyq tamaqtandyrý oryndary) kóbirek taralady. Sondaı-aq buryn aýyrǵandarmen qarym-qatynas kezinde, eske alý, toı-tomalaqqa barǵanda, karantındik talaptar saqtalmasa, jumysta da juqtyrýy yqtımal. Sondyqtan turǵyndardyń saqtyq sharalaryn umytpaǵany abzal.
Eske sala keteıik, budan buryn Batys Qazaqstanda sońǵy aptada koronavırýs juqtyrǵandar sany 41 paıyzǵa óskenin, osyǵan baılanysty qosymsha shekteý sharalaryn engizý usynylǵanyn jazǵan bolatynbyz.
Sondaı-aq oblysta jansaqtaý bóliminde jatqandar sany ósti.
