Batys Qazaqstanda sońǵy tórt kúnde 250-den astam adam koronavırýs juqtyrǵan
ORAL. QazAqparat – Batys Qazaqstan oblysynda sońǵy tórt kúnde 252 adam koronavırýs juqtyrǵan, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamentiniń baspasóz qyzmeti málim etkenindeı, 11-14 aqpan aralyǵynda tirkelgenderdiń 175-inde aýrý belgileri bolsa, qalǵan 77-sinde sımptomy joq.
Sonyń ishinde JRVI belgileri boıynsha tekserilgen 130, buryn aýyrǵandarmen qarym-qatynasta bolǵan 93, profılaktıkalyq maqsatta qaralǵan 22, statsıonarǵa emdeýge jatqyzý aldynda synama alynǵan 7 adamnan indet tabyldy.
Tórt kúnde syrqattanǵandardyń 151-i, ıaǵnı basym kópshiligi Oral qalasynda anyqtalǵan.
Sondaı-aq Bórli aýdanynda 28, Báıterekte 26, Terektide 17 adamnyń aýyrǵany belgili boldy.
Іndet bastalǵannan beri oblysta 12 124 naýqas tirkelip, sonyń 9 682-si jazylyp shyqty. 199 adam qaıtys boldy.
BQO «sary» aımaqta turǵanymen, epıdemıologııalyq ahýal áli de turaqsyz bolyp otyr.
Eske sala keteıik, budan buryn Batys Qazaqstanda koronavırýs juqtyrǵandardyń 80 paıyzǵa jýyǵy jazylyp shyqqanyn jazǵan bolatynbyz.
